Read Quechua Cuzco Bible 1988 SALMOS 27 Bible Online

SALMOS 27 - Quechua Cuzco Bible 1988 bible

SALMOS 27

¹Davidpa takin Señor Diosmi k'anchaykuwaqniypas qespichiwaqniypas, ¿pin manchachiwanman? Señor Diosmi hark'aykuwaqniyqa, ¿piñan manchapachiwanman?

²Rakraykuwanankupaq phawaykuwaspankun, millay awqaykunaqa ñoqa contra sayariqkunaqa misk'akuspan urmaykunqaku.

³Ejercitopas muyuykuwachun, manan sonqoyqa mancharikunqachu, soldadokunapas phawaykamuwachun, manan kuyurisaqchu.

⁴Kayllatan Señor Diosmanta mañakurqani, kayllatan munani: tukuy kawsasqay p'unchaykunapi Señor Diospa wasinpi kayta, sumaq-kayninta qhawanaypaq yupaychana wasinpi kusisqallaña qhawanaypaq.

⁵Sasa p'unchaykuna chayamuqtinqa Señor Diosmi wasinpi pakaykuwanqa, karpanpi llanthuykuwanqa, qaqa patamanmi sayaykachiwanqa.

⁶Hinaqtinmi muyuykuwaqniy awqaykunata llallisaq, sacrificiokunatan wasinpi kusisqa qaparispa haywasaq, Señor Diosmanmi takisaq paytan yupaychasaq.

⁷Señor Diosníy, qanmanmi waqyakamuyki. Uyariykuway, khuyapayaykuway, kutichimuway.

⁸Sonqoymi niwan: Señor Diosta yupaychay, nispa. Chaymi ñoqaqa yupaychaq hamuyki.

⁹¡Ama pakakuwaychu! Ama k'arakta phiñakuspayki kamachiykita qatiriwaychu. ¡Qanllan yanapaykuwaqniyqa kanki! Qespichiwaqniymi Diosniymi kanki, ama sapallayta saqerpariwaychu, ama wikch'urpariwaypaschu.

¹⁰Taytayña mamayña wikch'upuwanqa chaypas, Señor Diosmi uywakapuwanqa.

¹¹Señor Diosníy, awqaykunan qhawapayawanku, ñanniykita yachachiway, allin ñanninta pusaway.

¹²Ama awqaykunaq munayninman qaraykuwaychu, llulla testigokunan contray sayarimunku, maqanallawankupaqñan qhawashawanku.

¹³Ichaqa allintan yachani: kay kawsay pachapin Señor Diospa sumaq sonqo-kayninta rikusaq.

¹⁴¡Señor Diosman hap'ipaykukuy! ¡Kallpachakuy, ama pisipaychu! ¡Arí, Señor Diosman hap'ipaykukuy!