Read Quechua Cuzco Bible 1988 SALMOS 31 Bible Online

SALMOS 31 - Quechua Cuzco Bible 1988 bible

SALMOS 31

¹Davidpa takin Señor Diosníy, qanmanmi pakaykakamuyki, ama hayk'aqpas p'enqachisqa kanayta munaychu. Qanqa chanin Diosmi kanki, qespichiway.

²¡Uyariykamuway! ¡Qespichillawayña! Pakaykuwaqniy qaqay kay, Qespichiwaqniy pukaray kay.

³Qanmi Qaqaypas pakakunaypas kanki, pusaway waqaychaykuway, sutiyki yupaychasqa kananpaq.

⁴Ñoqapaq churasqanku llikamanta horqoway, qanmi pakaykuwaqniyqa kanki.

⁵Qanmanmi hap'ichikamuyki, Señor Diosníy, qanmi kacharichiwanki, hunt'aq Diosmi kanki.

⁶Yanqa ídolo yupaychaqkunatan cheqnikuni, ñoqataqmi qanman sonqollikuni.

⁷Mana p'itiytan munakuwanki, chaymi q'ochukuspa kusikusaq. Qanmi muchusqaykunata rikurqanki, llakikusqaykunatapas yachanki.

⁸Manan awqaman qaraykuwarqankichu, ñit'isqamantan kacharichimuwarqanki.

⁹Señor Diosníy, khuyapayaway, llaki-phutiypin rikukuni, llakikuymi ñawiytapas sonqoytapas llapallanta naq'echishawan.

¹⁰Kawsayniyqa nanaywanmi pisiyapushan, wataykunapas anchiywanmi chinkaripushan, huchallikusqaywanmi kallpay pisiyapushan, tulluykunan mullphayapushan.

¹¹Ñoqaqa kani awqaykunaq p'enqachinanmi, runamasiykunaqpas manchapakunanmi, reqsiqniykunaqpas mancharikunanmi. Hawapi rikuwaqniykunapas ayqerikuwankun.

¹²Wañusqata hinan llapalla qonqapuwanku, p'akisqa p'uyñu hinan kapuni.

¹³Askhaq chhiwchillapi rimasqantan uyarini, ¡tukuyneqpin manchachiwan! Huk-nisqallan contraypi rimanakunku, wañuchiwanankupaqtaq yuyaykunku.

¹⁴Señor Diosníy, ñoqaqa qanmanmi hap'ipaykukuni, ninin: ¡Qanmi Diosniyqa kanki! nispa.

¹⁵Qanmi kawsasqay p'unchaykunata qhawanki, awqaykunamanta qatiykachawaqniykunamanta qespichiway.

¹⁶Munakuq sonqoykiwan kamachiykita qhawarimuway, khuyakuwaspayki qespichiway.

¹⁷Señor Diosníy, waqyakamuykin, ama p'enqachisqa kanayta munaychu. Millay runakunataqa p'enqachiy, Wañuy-pachaman ch'inlla uraykuchunku.

¹⁸Llullakunaqa upallachunku, chanin runa contran anchaykachaspa pisichaspa k'arakta rimanku.

¹⁹¡May hatunmi yupaychaqniykikunapaq waqaychasqayki munakuq sonqo-kayniykiqa! ¡May hatunmi k'askaykukuqniykikunapaq runakunaq rikushasqan ruwasqaykiqa!

²⁰Hark'aykusqaykiwanmi runaq millay yuyaykusqankunamanta paykunata qespichinki, pakaykusqaykiwanmi awqankuq k'amikuyninmanta paykunata waqaychanki.

²¹Saminchasqa Señor Diosqa kachun, pukarasqa llaqta muyuykusqa hina kashaqtiymi, munakuwaspa musphanakunata ruwarqan.

²²Llakipakusqaypin nirqani: Qayllaykimantan wikch'usqaña kapuni, nispa. Ichaqa yanapayta mañakamuqtiymi qanqa waqyakamusqayta uyarimuwarqanki.

²³Señor Diosta munakuychis, llapa sonqollikuqninkuna, Señor Diosqa llapa paypaq hunt'aqkunatan waqaychan, uma hoqariqkunatataq sinchita muchuchin.

²⁴Señor Diosman llapa hap'ipaykukuqkuna, kallpachakuychis, sonqoykichispas kawsarichun.