Read Quechua Cuzco Bible 1988 SALMOS 32 Bible Online

SALMOS 32 - Quechua Cuzco Bible 1988 bible

SALMOS 32

¹Davidpa takin Kusisamiyoqmi huchallikusqan pampachasqa runaqa, kusisamiyoqmi huchanta pichasqa runaqa.

²Kusisamiyoqmi Señor Diospa mana huchachasqan runaqa, kusisamiyoqmi mana q'otuq runaqa.

³Huchayta mana willaykukushaqtiyqa, p'unchay ch'isiyaq anchisqaypin cuerpoy qawiyaykurqan.

⁴Tutantin p'unchaynintinmi makiyki muchuchiwarqan. Ruphay mitapi naq'esqa t'ika hinan llanllariyniypas t'awiykusharqan.

⁵Huchaytan willakurqayki, manan huchallikusqayta pakaykurqanichu. Nirqanin: Señor Diosmanmi mana kasukusqaykunata willakusaq, nispa, qanmi huchallikusqaytapas pampachawarqanki, qanmi huchaytapas pichawarqanki.

⁶Chaymi, hucha reparay p'unchaykunapi qan sonqokunaqa qanmanta mañakamuchunku, askha unuña wasapanqa chaypas paykunakamaqa manapunin aypanqachu.

⁷Qanmi pakakunayqa kanki, llakipakuymantan waqaychawanki, llalliy takikunawanmi muyuykuwanki.

⁸Señor Diosmi nin: Qantan qhawashayki. Ñoqan yachachisqayki, ñoqan yuyaychasqayki, ñoqan maynin ñan purinaykita yachachisqayki.

⁹Ama mana yuyayniyoqqa kaychu, ama caballo hinapas mulo hinapas kaychu, t'ikti-kaynintaqa waskhawanmi frenopiwanmi sayachina, mana chayqa, manan qayllaykamusunkimanchu, nispa.

¹⁰Imaymanatan millay runakunaqa muchunku, Señor Diosmi ichaqa payman k'askaykukuqkunata munakuspa waqaychashallanpuni.

¹¹Chanin runakuna, Señor Dioswan kusikuychis q'ochukuychis. Chanin sonqoyoqkuna, kusisqa qapariychis.