Read Quechua Cuzco Bible 1988 SALMOS 33 Bible Online

SALMOS 33 - Quechua Cuzco Bible 1988 bible

SALMOS 33

¹Chanin runakuna, Señor Diosta hatunchaychis, allinkunaqa yupaychanankupunin.

²Señor Diosman arpawan graciasta qoychis, tawtinkuwan takipuychis,

³sumaqtapuni t'ipsispa mosoq takita takipuychis, kusikuymanta qapariychis.

⁴Señor Diospa siminqa cheqaqmi, tukuy ruwasqanpas hunt'aq kasqantan rikuchin.

⁵Payqa chaninchaytan kuskachaytan munakun, Señor Diospa mana p'itiy munakuyninqa teqsimuyuntintan hunt'aykun.

⁶Señor Diosqa rimarispallan hanaq pachata rikhurichirqan, chaypi tukuy imaymanatapas simillanwanmi rikhurichirqan.

⁷Paymi mama qocha unuta qotu-qotuta hina huñuykun, paymi chinkaykuq ukhu unukunata taqerqarin.

⁸¡Teqsimuyuntin runa, Señor Diosta manchakuychis! ¡Hinantin pachapi tiyaqkuna, payta yupaychaychis!

⁹Paymi rimarirqan, hinan tukuypas kamasqa karqan, paymi kamachirqan, hinan tukuypas takyasqa karqan.

¹⁰Señor Diosqa hatun suyukunaq yuyaykusqantan qolluchin, llaqtakunaq yuyaykusqankunatan waqllichin.

¹¹Señor Diospa yuyaykusqankunan ichaqa wiñay-wiñaypaq kashallanqapuni, sonqonpi yuyaykusqankunan sayashallanqapuni.

¹²Kusisamiyoqmi Señor Diosniyoq hatun suyuqa, kaqnin kananpaq akllakusqan llaqtaqa.

¹³Señor Diosqa hanaq pachamanta qhawamuspan llapa runata rikumun,

¹⁴tiyananmantapachan kay pachantinpi tiyaqkunata qhawamun.

¹⁵Paymi sapankaq sonqonta ruwan, paymi lliw ruwasqankuta qhawashan.

¹⁶Manan mayqen reytapas askhallaña soldadonchu qespichin, manan kallpasapatapas allin kallpanchu qespichin.

¹⁷Yanqan caballoqa qespikunapaqqa, kallpasapaña chaypas, manan pitapas qespichiyta atinchu.

¹⁸Señor Diosmi ichaqa manchakuqninkunatapas, mana p'itiy munakuyninta suyakuqkunatapas qhawashallanpuni,

¹⁹wañunamanta paykunata qespichinanpaq, yarqay p'unchaykunapipas kawsachinanpaq.

²⁰Ñoqanchisqa Señor Diostan qhawarayakunchis, paymi yanapaykuwaqninchispas hark'aykuwaqninchispas.

²¹Chaymi sonqonchisqa Señor Dioswan kusikun, tukuy sonqonchiswanmi ch'uya sutinman hap'ipaykukunchis.

²²Señor Diosniyku, imaynan qanta suyakuykiku hinayá, mana p'itiy munakuyniykita mast'arimuwayku.