Read Quechua Cuzco Bible 1988 SALMOS 36 Bible Online

SALMOS 36 - Quechua Cuzco Bible 1988 bible

SALMOS 36

¹Davidpa takin Millay runamanqa mana allin-kaymi sonqon ukhuman rimaykun. Manan payqa hayk'aqpas Diostaqa manchakunchu.

²Pay kikintan yupaychakun, mana chanin ruwasqantaqa manan reparakunchu, manataq chayta millakunchu.

³Millay rimaqtaq llullataq kanpas, mana allin yuyayniyoqñan kapun, manañan allinkaqta ruwanchu.

⁴Puñunanpi chutarayaspanpas mana allin ruwayllatan yuyaymanan, waqllisqa ñannillanpin k'ullurayan, mana allinkaqmantaqa manan t'aqakuyta munanchu.

⁵Señor Diosníy, mana p'itiy munakuyniykin hanaq pachakama chayan, hunt'aq-kayniykin phuyuq kasqankama chayan.

⁶Chaninchayniykiqa orqokuna hina hatunpunin, chaninchasqa simiykikunaqa mama qocha hinan hatun sinchi ukhullaña. Señor Diosníy, qanmi runatapas uywatapas michishanki.

⁷Diosníy, ¡ima sumaqmi munakuyniykiqa! Chaymi runakunaqa raphraykiq llanthunpi llanthukunku.

⁸Wasiykipi askha mikhunawanmi allin saksasqatapuni saksaykunku, qanmi paykunaman misk'illaña mayuykimanta ukyachinki.

⁹Qanmantan kawsayqa paqarimun, k'anchayniykipin k'anchayta rikuyku.

¹⁰Reqsiqniykikunata munakushallaypuni, cheqaq sonqoyoqkunapaqpas chaninchapushallaypuni.

¹¹Anchaykachaqkunaq chakinqa ama sarunchakuwachunchu, millay runakunaq makinpas ama kuyurichiwachunchu.

¹²¡Chaypin millay ruwaqkunaqa wikch'urayapushanku! ¡Manaña hatariqmi urmaykapunku!