Read Quechua Cuzco Bible 1988 SALMOS 37 Bible Online

SALMOS 37 - Quechua Cuzco Bible 1988 bible

SALMOS 37

¹Davidpa takin Ama llakikuychu millay ruwaq runakunamanta, ama envidiakuypaschu mana chanin ruwaqkunata.

²Usqhayllan q'achu hina ch'akipunqaku, llanllashaq qora hinan naq'epunqaku.

³Señor Diosman hap'ipaykukuy, allinkaqtataq ruway, kay hallp'api tiyakuy, hunt'aqllapunitaq kay.

⁴Hinallataq Señor Dioswan anchata kusikuy, paytaq sonqoykiq munasqankunata qosunki.

⁵Señor Diosman kawsayniykita hap'iykachikuy, payman hap'ipaykukuy, paytaqmi yanapaykusunki.

⁶Chaninchayniykita pacha illariyta hina k'anchachinqa, kuskachayniykitapas chawpi p'unchay intita hina k'anchachinqa.

⁷Señor Diospa qayllanpi ch'inlla tiyakuy, paytaqa suyakullay. Ama llakikuychu kawsayninkupi t'ikariqtinku, mana chanin yuyaykusqanku allinyaqtin.

⁸Ama phiñakuychu, ama k'araktaqa phiñakuychu, amapuni llakikuychu, chayqa mana allinkunallatan paqarichin.

⁹Millay runakunaqa wikch'usqapunin kanqaku, Señor Diosta suyakuqkunan ichaqa kay hallp'ata chaskinqaku.

¹⁰As pisi tiempomantaqa chinkapullanqan millay runakunaqa, maskhaspaykipas manañan tarinkichu.

¹¹Llamp'u sonqokunan ichaqa kay hallp'ata chaskinqaku, sumaq thak-nisqataq tiyakunqaku.

¹²Millay runaqa chanin runaq mana allinnintan yuyaykun, pay contran k'utupakun.

¹³Señor Diosmi ichaqa paymanta asikun, yachanmi paypaqqa muchunan p'unchay chayamushasqanta.

¹⁴Millay runakunaqa espadatan horqokunku, wach'inankutapas mat'inkun, wakchakunatapas mana imayoqkunatapas urmachinapaq, chanin kawsaqkunata sipinapaq.

¹⁵Espadankuqa sonqollankumantaqmi haykunqa, p'eqtankupas p'akirqarikunqan.

¹⁶Aswan allinmi chanin runaq pisilla kaqninqa, askha huchasapakunaq askhallaña kaqninkumantaqa.

¹⁷Mana chaninkunaq atiyninqa qollupunqa, chaninkunatan ichaqa Señor Dios sayachinqa.

¹⁸Señor Diosqa qhawamushanmi chanin runakunaq kawsasqantaqa, hallp'ankupas wiñaypaqmi kashanqa.

¹⁹Mana allin tiempopiqa manan llakipakunqakuchu, aswanmi yarqay kaqtinpas saksata mikhunqaku.

²⁰Millay runakunan ichaqa chinkapunku, Señor Diospa awqankunaqa qora hinan kanku, paykunaqa q'osñi hinan chinkapunku.

²¹Millay runaqa manukunmi manataq kutichipunchu, allin runan ichaqa sumaq sonqo kaspa qopun.

²²Señor Diospa saminchasqankunaqa kay hallp'atan chaskinqaku, paypa ñakasqankunan ichaqa wikch'usqa kapunqaku.

²³Señor Diosmi runataqa pusan may ñannintachus purinanta, paymi munasqan runata allinta sayachin.

²⁴Urmanqaña chaypas, manan wikch'urayashallanqachu, Señor Diosmi paytaqa rampashan.

²⁵Waynallan karqani, kunantaq machuyapuniña, manan hayk'aqpas rikurqanichu chanin runata Señor Diospa saqerparisqanta, manan hayk'aqpas rikurqanichu wawankunatapas mikhuna mañapakushaqta.

²⁶Sumaq sonqo kaspan aynirillanpuni. Wawankunapas saminchataqmi.

²⁷Mana allinkaqmanta t'aqakuy, allinkaqtataq ruway, chaymi mana imanasqalla tiyanki.

²⁸Señor Diosqa chanin runatan munakun, manan pay sonqo runataqa saqerparinchu. Wiñaypaqmi paykunaqa waqaychasqa kanqaku, millay runakunaq mirayninmi ichaqa chinkachipusqa kanqa.

²⁹Chanin runakunaqa kay hallp'atan hap'ikapunqaku, chaypin wiñaypaq tiyanqaku.

³⁰Chanin runaq siminqa yachaytan riman, qallunpas chaninchasqatan riman.

³¹Diosninpa yachachikuynintaqa sonqonpin hap'ishan, manan hayk'aqpas llusk'akunqachu.

³²Millay runaqa chanin runatan qhamiyan, wañuchiytapunitaq munan.

³³Señor Diosqa manan paywan hap'iykachinqachu, manallataqmi juzgaqtinkupas huchachanqachu.

³⁴Señor Diosta suyakuy, simintapas kasukuy, paytaqmi hatunchasunki hallp'ata chaskinaykipaq, ñawiykiwanmi rikunki millaykunaq wañurasqanta.

³⁵Huk millay runatan sinchi uma hoqariqta rikurqani, k'allmasapa q'omer sach'a hina mast'arikushaqta,

³⁶ichaqa chinkapurqanmi, manañan kapurqanchu, maskharqanin manañan tarirqanichu.

³⁷Qhawariy hunt'asqa runata, qhawariy chanin runata, thak-nisqa kawsaq runaqa mirayniyoqmi kanqa.

³⁸Huchasapakunan ichaqa llapallan wañuchisqa kanqa, mirayninkupas chinkachipusqan kanqa.

³⁹Chanin runakunataqa Señor Diosmi yanapaykun, paymi llaki-phutiy p'unchaykunapi pakaykuqninqa.

⁴⁰Paykunan Señor Diosman hap'ipaykukunku, chaymi paykunataqa yanapaykunpas qespichinpas, millay runakunamantan kacharichispa qespichin,