Read Quechua Cuzco Bible 1988 SALMOS 40 Bible Online

SALMOS 40 - Quechua Cuzco Bible 1988 bible

SALMOS 40

¹Davidpa takin Señor Diostan suyakushallarqanipuni, paymi kutirimuwarqan waqyakusqaytan uyariykuwarqan.

²Manchay llakikuy p'uytumantan horqowarqan, tuytuq t'uruman chinkaykunaymantan qespichiwarqan, qaqa patamanmi sayaykachiwarqan, hinaspan allinta thaskirichiwarqan.

³Chaymantataq mosoq takita takichiwarqan, Diosninchista yupaychana takita. Askhan chayta rikunqaku, hinaspan manchakunqaku, Señor Diosmanpas sonqollikunqaku.

⁴Kusisamiyoqmi Señor Diosman sonqollikuq runaqa, anchaykachaqkunatapas mana qatikuqqa, manallataq wak dioskunata yupaychaqkunatapas qatikuqqa.

⁵Apu Señor Diosnilláy, askhallañan musphana ruwasqaykikunaqa, askhallañan yuyarikuwasqaykikunaqa. Chaykunamanta rimariyman chaypas, manan yupay atikunmanchu. ¡Manan pipas qan hinaqa kanchu!

⁶Manan munankichu sacrificiotapas ruru ofrendatapas, manallataqmi mañakunkichu ruphachina sacrificiotapas hucha pampachaypaq sacrificiotapas. Aswanpas ninriytan makilla uyarichiwarqanki,

⁷hinaqtinmi nirqani: Hamushaniñan, k'uyusqa qelqapin ñoqamanta qelqasqa kashan.

⁸Diosníy, munayniykitapunin ruwayta munani, yachachikuy simiykitan sonqoy ukhupi hap'ini, nispa.

⁹Askhallaña llaqtayki huñukuypin qespichiwasqaykimanta sumaq willakuyta willarqani, manapunin upallakurqanichu, Señor Diosníy, qanmi chaytaqa yachanki.

¹⁰Manan qespichiwasqaykita sonqoy ukhupi pakaykurqanichu, hunt'aq kasqaykitawan kacharichiwasqaykitawanmi willarqani. Llapallan huñusqa llaqtayki qayllapi manan munakuyniykitapas hunt'aq-kayniykitapas pakaykurqanichu.

¹¹Qanmi, Señor Diosníy, sumaq sonqo-kayniykiwan qhawariwanki, munakuyniykipas hunt'aq-kayniykipas waqaychawanmi.

¹²Mana yupay atiy sasakunan muyuykuwan, mana chanin ruwasqaykunan mayt'uykuwan, manataqmi rikuytapas atinichu. Chukchaymantapas aswan askharaqmi, chaymi sonqoypas p'iti-p'itiwan.

¹³Señor Diosníy, hamuy qespichiwanaykipaq, usqhamuy yanapaykuwanaykipaq.

¹⁴Wañuchiwayta munaqkunaqa p'enqachisqa k'umuykachisqa kachunku. K'iriwayta munaqkunaqa p'enqasqa ayqerichunku.

¹⁵Asipayawaqniykunaqa p'enqasqapuni rikukuchunku.

¹⁶Qanman llapa hamuqkunataq ichaqa qanwan q'ochukuchunku kusikuchunku. Qespichisqaykita munakuqkunaqa: ¡Señor Diosqa hatunchasqa kachun! nispallapuni nichunku.

¹⁷Ñoqataqa, Señor Diosníy, llakisqaña wakchaña kashani chaypas, manan qonqakuwankichu. Qanmi yanapaykuwaqniypas qespichiwaqniypas kanki. Diosníy, usqhamullayña yanapaykuwanaykipaq.