Read Quechua Cuzco Bible 1988 SALMOS 44 Bible Online

SALMOS 44 - Quechua Cuzco Bible 1988 bible

SALMOS 44

¹Korepa churinkunaq takin Diosniyku, ninriykuwanmi uyarirqayku, machulaykun willawarqanku p'unchayninkupi ruwasqaykita, ñawpa p'unchaykunapi ruwasqaykita.

²Qanmi makiykiwanpuni mana iñiyniyoq suyukunata qarqorqanki, machulaykutataq chaypi tiyachirqanki, llaqtakunata muchuchirqanki, machulaykutataq chaypi t'ikarichirqanki.

³Manan espadankuwanchu chay suyutaqa hap'irqanku, manan kallpankupaschu paykunataqa atipachirqan. Aswanpas atiyniykin, kallpaykin, paykunawan kasqaykipiwanmi atipachirqan, machulaykuta munakusqaykirayku.

⁴Qanmi Diosniyqa, Reyniyqa kanki, qanmi kamachiwaqniyqa, Jacobta llallichiqpas kanki.

⁵Qanwanpunin awqaykutaqa tanqarpariyku, sutiykipin phawaykuwaqniykutaqa t'ustuyku.

⁶Manan ñoqaqa p'eqtaymanchu k'askakuni, manan espadaypas llallichiwanchu,

⁷qanmi awqaykuta atipachiwarqankiku, qanmi cheqnipakuwaqniykuta p'enqachirqanki.

⁸¡Diosniyku, qanpin hatunchakullarqaykupuni, wiñaypaqmi sutiykitapas yupaychasaqku!

⁹Ichaqa ñan wikch'urpariwankikuña, p'enqasqatan k'uytuchiwankiku, manañan soldadoykuta riysinkiñachu.

¹⁰Awqaykuq ñawpaqenmantan qhepaman kutirichiwarqankiku, cheqnikuwaqniykun llat'anawarqanku.

¹¹Nak'anapaq ovejakunata hinan hap'iykachiwarqankiku, hatun suyukuna ukhumantaq ch'eqeykachiwarqankiku,

¹²mana imallamanmi llaqtaykita qhaturqanki: Ama imatapas pagawaychu, nirqankin.

¹³Qayllaykupi tiyaqkunawanmi k'amichiwarqankiku, muyuriqniykupi kaqkunawanmi asipayachiwarqankiku pisichachiwarqankiku.

¹⁴Asipayanamanmi hatun suyukuna ukhupi tukuchipuwarqankiku, tukuymi rikuwaspanku umankuta maywikunku.

¹⁵Sapa p'unchaymi p'enqakushallanipuni, p'enqasqan k'umuykuni,

¹⁶k'amiwaqniypa p'enqachiwaqniypa simin hawa, ayni-kutichiwayta munaq hawa, awqay hawa.

¹⁷Qantaña yuyarishayku chaypas, rimanakuyniykutaña hunt'ashayku chaypas, chay hinatan muchushayku.

¹⁸Manan sonqoykupiqa saqepuykikuchu, manan ñanniykikunamantapas t'aqarikuykuchu,

¹⁹chaypas salqa animalkunaq kananpin saqerpariwarqankiku, laqha tutayaqmanmi wikch'urpariwarqankiku.

²⁰Diosniyku, qonqapuykikumanchus karqan chayqa, wak diostachus yupaychaykuman karqan chayqa,

²¹chaytaqa reparawaqpunin karqan, qanqa sonqo ukhullapi pakasqakunatapas yachankin.

²²Ichaqa qanraykun sapa p'unchaylla wañuchishawanku, nak'anapaq ovejakunata hinan rikuwanku.

²³¡Rikch'arillayña, Señor Diosniyku! ¿Imanaqtintaq puñunki? ¡Sayariy, ama wiñaypaqchu karunchakuwayku!

²⁴¿Imanaqtintaq pakakuwankiku? ¿Imanaqtintaq muchusqaykutapas ñak'arisqaykutapas qonqapunki?

²⁵Pampakama k'umuykachisqan kashayku, pampapi wikch'urparisqan kashayku.

²⁶¡Sayarimuy yanapaykuwanaykikupaq, qanmi mana p'itiyta munakushawankiku, chayrayku qespichiwayku.