Read Quechua Cuzco Bible 1988 SALMOS 45 Bible Online

SALMOS 45 - Quechua Cuzco Bible 1988 bible

SALMOS 45

¹Korepa churinkunaq takin Sumaq simikunan sonqoyta kuyurichishan, taki kamarisqaytan reypaq takini, ñoqaqa rimashani misk'ita rimaq allin qelqaq hinan.

²Llapa runamantapas aswan munaychan kanki, sumaq simin simiykimantaqa phullpumun, chaymi Diosqa wiñaypaq samincharqasunki.

³Kallpasapa runa, teqniykiman espadaykita warkuykukuy, ¡qanqa ancha sumaq qhapaqmi kanki!

⁴Sillaykusqa qhapaq-kayniykipi llallinaykipaq ñawpariy, cheqaq-kaypaq maqanakuq, wakchakunapaqpas chaninchapuq. ¡Paña makiykin askha utirayanatapuni ruwanqa!

⁵Ñawpaqeykimanmi llaqtakunaqa urmaykunku, wach'inaykikunaqa ñawch'illañan, awqaykikunaq sonqonmanmi ch'antikun.

⁶Kamachikuyniykiqa, Diosníy, wiñay-wiñaypaqmi, chaninninpin llaqtaykita kamachinki.

⁷Chaninchaytan munakunki, mana chanin-kaytataq cheqnikunki. Chayraykun Diosniykiqa runamasiykikunamanta qanta hatunchaspa aceitewan hawirqasunki, chaywanmi anchallataña kusichirqasunki.

⁸Llapa p'achaykin mirrata, áloeta, canelata q'apashan, arpakunawanmi marfilwan sumaqchasqa qhapaq wasikunapi kusichisunkiku.

⁹Muyuykuqniyki allichachaq warmikuna ukhupin ñust'akuna kashan, pañaneqeykipin qoya tiyashan, Ofir sumaq qoriwan sumaqchasqa.

¹⁰Uyariykuway ususilláy, makilla uyariykuway: Llaqtaykitapas aylluykitapas qonqapuy,

¹¹reyqa sumaq rikch'ayniyoq kasqaykitan munashan, payqa wiraqochaykin, paytaqa hatunchanaykin.

¹²Tiro llaqta runakunan sumaq sonqokunantin mañakuq hamusunkiku, qhapaqkunan imaymanantin hamusunkiku. Ñust'aqa munayllañan wasipi kashan, p'achanpas qoriwan minisqan.

¹⁴Pallaysapa ñañaqawan churaykusqatan reyman pusanku, sipasmasinkunan qhepanta rinku, hinaspa reypaman haykunku.

¹⁵Ancha kusisqallañan asuykunku, q'ochukuspan reypa qhapaq wasinman haykunku.

¹⁶Reyníy, askha churikunayoqmi kanki, paykunan machulaykiq rantinpi kamachikunqaku, qanmi hinantin pachapi kamachikunankupaq churanki.

¹⁷Sutiykitan sapanka miraypi yuyarichisaq, chaymi llaqtakunaqa wiñay-wiñaypaq yupaychasunkiku.