Read Quechua Cuzco Bible 1988 SALMOS 49 Bible Online

SALMOS 49 - Quechua Cuzco Bible 1988 bible

SALMOS 49

¹Korepa churinkunaq takin Llapa llaqtakuna, kayta uyariychis, teqsimuyuntinpi tiyaqkuna, uyariychis,

²yanqa runakunapas wiraqochakunapas, uyariychis, qhapaqkunapas wakchakunapas, uyariychis.

³Yachaytan rimarisaq, allin khamusqa simikunatan rimarisaq.

⁴Rikch'anachiy simitan willasaq, arpata tocaspaymi watuchinayta sut'inchasaq.

⁵¿Imanaqtintaq manchakuyman llaki qatikuy p'unchaykunapi, mana chanin sarunchakuwaqniykuna muyuykuwaqtin?

⁶Paykunaqa kaqninkumanmi hap'ipakunku, may askha qhapaq-kayninkumantan umata hoqarinku.

⁷Manan mayqenninkupas wawqenta kacharichiyta atinqachu, manan kawsayninta rescatananpaq Diosman pagapuyta atinqachu.

⁸Runaq kawsayninta rantinapaqqa sinchi chaniyoqmi, manan qolqepas aypanchu

⁹mana wañuspa kawsashanallanpaqqa.

¹⁰Chhaynaqa, wañunmi hamawt'apas, mana yuyayniyoqpas, zonzopas, hukkunapaqtaq kaqninkupas qhepapun.

¹¹Paykuna p'ampanan wiñaypaq tiyanankuqa, chaypin wiñay-wiñaypaq qhepanqaku, hallp'akunataña sutinkuwan sutichanku chaypas.

¹²Runaqa allin qhawarishasqaña kashaspapas, manan wiñaypaqchu, uywakuna hinan wañun.

¹³Chay hinatan kikinkuman hap'ipakuqkunaqa wañun, chay hinatan kaqnillankuwan kusikuqkunaqa tukukunku.

¹⁴Oveja hinan Wañuy-pachapaq nisqaña kanku, Wañuymi paykunataqa michinqa. Paqarimuqtintaq chanin runakunaqa paykunata kamachinqa, munayllaña wasinkumanta karunchasqan cuerponkuqa ismuykapushanqa.

¹⁵Diosmi ichaqa Wañuy-pachaq atiyninmanta kacharichiwanqa, paymi pusakapuwanqa.

¹⁶Ama manchakuychu pipas qhapaqyaqtinqa, wasinpi tukuy imapas yapakuqtinqa,

¹⁷wañukapuspanqa manan imatapas apanqachu, manan tukuy imanpas qhepanta uraykunqachu.

¹⁸Kawsashaspaña kusikunqa chaypas, runaña qhapaq kaqtin yupaychanqa chaypas,

¹⁹machulankunamanmi Wañuy-pachapi huñukapunqa, manan k'anchaytapas rikunqañachu.

²⁰Runaqa allin qhawarisqaña kashaspapas, manan wiñaypaqchu, uywakuna hinan wañun.