Read Quechua Cuzco Bible 1988 SALMOS 51 Bible Online

SALMOS 51 - Quechua Cuzco Bible 1988 bible

SALMOS 51

¹Betsabewan Davidpa huchallikusqan qhepatan profeta Natanqa payman rirqan. Chaymantan Davidqa kay takita kamarirqan. Diosníy, mana p'itiy munakuq kaspayki khuyapayaykuway. Ancha khuyapayakuq kaspayki huchallikusqaykunata pichaykuway.

²¡Llapallanta mana allin-kayniyta maylliykuway, huchaymanta ch'uyanchaykuway!

³Ñoqaqa mana kasukusqaykunata reqsikunin, huchaytaqa yuyarishallanipunin.

⁴Qan contrallapunin huchallikuni, millakusqaykitan ruwani. Chaymi huchachawayniykiqa chaninpuni, taripawayniykipas chaninpuni.

⁵Cheqaqtapunin huchallantinña nacerqani, huchallantintañan mamay wachakuwarqan.

⁶Cheqaqtapunin qanqa sut'i sonqota munakunki, chayrayku yachayta sonqollaypi yachachiway.

⁷Ch'uyanchaway, ch'uyataq kasaq, maylliway, rit'imantapas aswan yuraqtaq kasaq.

⁸Huktawan q'ochukuyta kusikuyta uyarichiway, llakiq ñit'isqanña kashani chaypas kusirichiway.

⁹Ama huchaykunata qhawariychu, lliw mana allin-kayniykunatapas pichaway.

¹⁰Diosníy, ch'uya sonqota kamariway, cheqaq sonqoyoq kanaypaq mosoqyachiway.

¹¹Ama qayllaykimanta wikch'uwaychu, amataq Santo Espirituykita qechukapuwaychu.

¹²Qespichiwasqayki q'ochukuywan q'ochurichillawaytaq, qanta usqhaylla kasukuq sonqoyoqta ruwaway,

¹³chaymi mana kasukuqkunaman ñanniykikunata yachachisaq, huchasapakunataq kutirikamusunkiku.

¹⁴Qespichiwaqniy, Diosníy, ama munaychu runa wañuchiq kanayta, ñoqaqa chanin kasqaykitan takisaq.

¹⁵Señor Diosníy, rimarichiway, chaymi yupaychasqayki.

¹⁶Manan sacrificiotachu munanki, ruphachina sacrificiota haywaqtiypas manan chaskiwankimanchu.

¹⁷Sonqoykiman chayaq sacrificioqa llakikuq sonqoymi, Diosníy, qanqa manan qhawarparinkichu llakikuq huch'uyyaykukuq sonqoyoqtaqa.

¹⁸Allin sonqoykiwan Sión llaqtata sumaqta qhawariy, Jerusalén muyuriq perqata wakmanta perqachiy.

¹⁹Chaypachan chanin sacrificiokuna kanqa, chaypachan altarniykipi ruphachina sacrificiokuna torillokuna kanqa, chaykunan sonqoykiman chayaqpuni kanqa.