Read Quechua Cuzco Bible 1988 SALMOS 56 Bible Online

SALMOS 56 - Quechua Cuzco Bible 1988 bible

SALMOS 56

¹Filistea runakunan Gat llaqtapi Davidta hap'irqanku. Chay qhepatan Davidqa kay takita kamarirqan. Diosníy khuyapayaykuway, runan qatiykachashawan, sapa p'unchaymi awqaykuna alqochakuwan.

²P'unchay-ch'isiyaqmi awqaykuna qatiykachawan, askhan anchaykachaspa maqawanku.

³Manchapakuspayqa qanmanmi hap'ipakamuyki.

⁴Diosmanmi k'askaykukuni, simintapas yupaychanin, Diosmanmi hap'ipaykukuni, manan manchapakunichu. Runari, ¿imanawanmantaq?

⁵Sapa p'unchaymi paykunaqa rimasqaykunata q'ewinku, imaynallamantapas k'iriwaytapunin yuyaykunku.

⁶Paka-pakarikuspan purinku, purisqaytan makilla qhawanku, wañuchiwanankupaqmi suyapashawanku.

⁷Huchallikusqankumantaqa, ¿manachu muchunqaku? Diosníy, k'arakta phiñakuspayki llaqtakunata mast'arpariy.

⁸Qanmi kayman chayman purisqaykunata yuparqanki, qanmi weqeykunata odreykiman huñurqanki. ¿Manachu chaykunaqa qelqaykipi qelqasqa kashan?

⁹Qanmanta mañarikuqtiymi awqaykunaqa kutikapunku. Ñoqaqa yachanin Diosqa ñoqawan kashasqanta.

¹⁰Diosmanmi hap'ipaykukuni, simintapas yupaychanin, Señormanmi k'askaykukuni, simintapas yupaychanin,

¹¹Diosmanmi hap'ipaykukuni, manan manchapakunichu. Runari, ¿imanawanmantaq?

¹²Diosníy, wañuymantan qespichiwarqanki, urmaymantan horqowarqanki. Chaymi ñawpaqeykipi kawsay k'anchaypi purispa prometekusqaykunata hunt'asaq, agradecekuy sacrificiokunata haywasqayki.