Read Quechua Cuzco Bible 1988 SALMOS 57 Bible Online

SALMOS 57 - Quechua Cuzco Bible 1988 bible

SALMOS 57

¹Qaqa t'oqomanmi Davidqa Saulmanta ayqerqan. Chaymantan kay takita kamarirqan. Diosníy, khuyapayaykuway, ñoqata khuyapayaykuway, qanpin pakaykukuni. Raphrayki ukhupin pakaykukusaq sinchi sasakuna pasanankama.

²Qollana Diosmanmi waqyakuni, ñoqapaq yuyaykusqanta hunt'aq Diosman.

³Paymi hanaq pachamanta uyarimuwaspa qespichiwanqa, paymi qatiykachawaqniykunata atipanqa, paymi mana p'itiy munakuynintapas hunt'aq-kaynintapas rikuchiwanqa.

⁴Runa mikhuq leonkuna ukhupi hinan wikch'urayashani, kirunkuqa lanzakuna hinan, wach'inakuna hinan, qallunkuqa ñawch'iyachisqa espada hinan.

⁵Diosníy, hanaq pachapi qollana kasqaykita rikuchikuy, lliphlli-kayniyki kay pachantinman hunt'aykuchun.

⁶Chakiypaqmi llikata mast'arqanku, sonqoymi pisiparqan. T'oqotan ñanniypi hasp'irqanku, ichaqa paykunallataqmi chayman urmaykurqanku.

⁷Diosníy, tukuy sonqowanmi hap'ipakamuyki, sonqoyqa manan pisipanchu, takisaqñan yupaychasaqñan.

⁸¡Rikch'ariy, almalláy! ¡Waqariy, tawtinkulláy! ¡Tocariy, arpalláy! ¡Pacha illarimuytan rikch'arisaq!

⁹Señor Diosníy, llaqtakuna ukhupin agradecekusqayki, hatun suyukuna ukhupin yupaychasqayki.

¹⁰Munakuyniykiqa hanaq pachamantapas aswan hatunmi, hunt'aq-kayniykiqa phuyuq kasqankaman aypan.

¹¹Diosníy, hanaq pachapi qollana kasqaykita rikuchikuy, lliphlli-kayniyki kay pachantinman hunt'aykuchun.