Read Quechua Cuzco Bible 1988 SALMOS 59 Bible Online

SALMOS 59 - Quechua Cuzco Bible 1988 bible

SALMOS 59

¹Davidpa wasin qhamiyaqtan Saulqa runankunata kacharqan payta wañuchinanpaq. Chaymantan Davidqa kay takita kamarirqan. ¡Diosníy, awqaykunamanta hark'aykuway, awqay hatarimuqkunamanta amachaway!

²¡Mana chanin ruwaqkunamanta hark'aykuway, runa wañuchiqkunamantapas qespichiway!

³Señor Diosníy, ¡qhawariy! Wañuchiwanankupaqmi suyapashawanku, yana alma runakunan ñoqa contra huñukunku. Manan huchallikurqanichu, manan ima millaytapas ruwarqanichu,

⁴manan ima huchaypas kanchu, chaypas paykunaqa phawaykamuwankun. ¡Rikch'ariy! ¡Yanapaykuway! ¡Imaynachus kasqanta qhawariy!

⁵Qanmi Tukuy-atiyniyoq Diosqa kanki, qanmi Israelpa Diosninqa kanki. Rikch'ariy hinaspa mana iñiyniyoqkunata muchuchiy, ama khuyapayaychu runamasinkuta qaraykuq chay millaykunataqa.

⁶Sapa ch'isin kutimunku, alqokuna hinan qhansapakunku, llaqtatan imatapas maskhaq hina muyuykunku.

⁷Espada hina k'iriq kunkawanmi phosoqo simillantinña qaparinku, paykunaqa yuyankun mana pipas reparasqanta.

⁸Señor Diosníy, qanmi paykunata asipayanki, qanqa chay mana iñiyniyoqkunawanmi pukllakunki.

⁹Kallpachaykuwaqníy, qantan suyakamuyki, Diosníy, qanmi pakaykuwaqniyqa kanki.

¹⁰Munakuwaqniy Diosqa ñawpaqeytan rinqa, awqaykunatan atipachikusqankuta rikuchiwanqa. Señor Diosniyku, pakaykuwaqniyku,

¹¹ama paykunata wañuchiychu, paqtan llaqtayqa chayta qonqapunman, atiyniykiwan ch'eqechispa k'umuykachiy.

¹²Rimasqankuwanmi huchallikunku, siminkuwanmi huchallikunku, hatunchakusqankuwan urmaykuchunku. Ñakankun llullakunkun,

¹³phiñakuspayki paykunata tukurpariy, manaña kanankupaq paykunata tukurpariy. Chay hinapin teqsimuyuntinpi yachanqaku Jacobpa mirayninpi Diosqa rey kasqanta.

¹⁴Sapa ch'isin kutimunku, alqokuna hinan qhansapakunku, llaqtatan imatapas maskhaq hina muyuykunku.

¹⁵Mikhunata maskhaspan purinku, mana saksaspataq waqanku.

¹⁶Ñoqan ichaqa atiyniykimanta takisaq, tutamantan munakuyniykimanta sumaqta takisaq, waqaychaykuwasqaykirayku llakikusqay p'unchaypipas pakaykuwasqaykirayku.

¹⁷Diosníy, yupaychaykunatan takipusqayki, kallpachaykuwaqníy, qanmi pakaykuwaqniyqa kanki, qanqa munakuwaqniy Diosmi kanki.