Read Quechua Cuzco Bible 1988 SALMOS 65 Bible Online

SALMOS 65 - Quechua Cuzco Bible 1988 bible

SALMOS 65

¹Davidpa takin Diosniyku, qanqa Sionpi yupaychanapaq hinapunin kanki, qanman prometekusqaykutaqa hunt'asaqkupunin,

²qanqa mañakusqatan uyarinki, llapa runan hamusunkiku.

³Huchallikusqaykun munaychakuwanku, qanmi ichaqa huchallikusqaykuta pampachanki.

⁴Kusisamiyoqmi akllakusqayki runaqa, qayllaykipi tiyananpaqmi pusanki. Ñoqaykuqa wasiykipi allinkaqwanmi kusisqa kasaqku, ch'uya wasiykipin saminchasqa kasaqku.

⁵Diosniyku, Qespichiqniyku, anchatapuni chaninchapuwaspaykikun qanqa kutichimuwankiku. Teqsimuyuntin runakunan suyakusunkiku, karu mama qocha patapi tiyaqkunan suyakusunkiku.

⁶Qanmi atiyniykiwan kallpaykiwan orqokunata allinta sayachirqanki.

⁷Qanmi mama qochaq qaparisqanta thanichirqanki, sinchi phoqchiqesqantapas upallachirqanki, llaqtakunaq ch'aqwasqantapas ch'inyachirqanki.

⁸Chaymi karullapiña tiyaqkunapas musphana ruwasqaykikunata rikuspa khatatatanku. Qanmi inti lloqsimuypi runakunatapas inti haykuypi runakunatapas kusisqata qaparichimunki.

⁹Qanmi kay pachata watukunki, parachispaykin ruruchinki. Mayuykiqa llasaqllañan, chay hinatan trigo chakrakunata wiñachinki, chay hinatan chakrata wakichinki.

¹⁰Qanmi chakra wachukunata hallch'uchanki, qanmi ch'aki cheqaskunatapas qarpanki, chaytan llasaq parawan chulluchinki, hinaspan rurusqanta saminchanki.

¹¹Qanmi cosecha qayllamuqta allinkunawan saminchanki purishaspaykipas allintan parachimunki.

¹²Purun q'achupas q'omeryanmi, orqokunapas llaq-nisqamanmi tukun.

¹³Pampakunamanmi uywa t'aqa hunt'aykun, qheswakunapas trigowanmi hunt'aykun. Llapallanmi kusisqa qaparispa takinku.