Read Quechua Cuzco Bible 1988 SALMOS 66 Bible Online

SALMOS 66 - Quechua Cuzco Bible 1988 bible

SALMOS 66

¹Teqsimuyuntinpi tiyaqkuna, Diosman kusisqa takiychis.

²Qhapaq sutinman takiychis, hatunchaspa yupaychaychis.

³Diosta niychis: ¡May musphanan ruwasqaykikunaqa! Ancha atiyniyoqmi kanki, awqaykikunaqa manchakuspasuykin huch'uyyaykukunku,

⁴teqsimuyuntin runakunan k'umuykamusunkiku, qanta yupaychaspan takinku, nispa.

⁵Hamuychis Diospa ruwasqankunata rikuq, hamuychis runakuna ukhupi manchana ruwasqankunata qhawaq.

⁶Paymi mama qochata ch'akichirqan, mayutan chakillapi chimparqanku. Chay ruwasqanwanmi kusikusunchis.

⁷Paymi atiyninwan wiñaypaq kamachin, hatun suyukunatan makilla qhawashan, ama mana kasukuqkuna pay contra sayarinankupaq.

⁸Hatun suyukuna, Diosniykuta saminchaychis. Pay yupaychana takiykichista hukkunaman uyarichiychis.

⁹Payqa kawsachiwarqankun, manan urmanaykuta munarqanchu.

¹⁰Diosniyku, qanmi probaykuwarqankiku, qolqeta hina ch'uyanchawarqankiku.

¹¹Llikawanmi hap'ichiwarqankiku, sinchi llakitan q'epiykachiwarqankiku,

¹²runawanmi t'ustuchiwarqankiku, ninanta ununtan chimparqayku, chaypas allinninkaqmanmi horqowarqankiku.

¹³Wasiykimanmi haykusaq ruphachina sacrificiokunata qanman haywanaypaq, prometekusqaykunata qanpaq hunt'anaypaq,

¹⁴llaki-phutiypi kashaspay qanman simi rimarisqaykunata hunt'asaq.

¹⁵Wirallaña uywakunatan haywasqayki, sonqoykiman chayaq borregokunatan haywasqayki, torokunatan orqo cabrakunatan haywasqayki.

¹⁶Hamuychis Diosta llapa manchakuqkuna, uyariychis, imatachus ruwapuwasqantan willasqaykichis.

¹⁷Paytan waqyakurqani, paytan yupaycharqani.

¹⁸Sonqoypichus mana chaninta yuyaykuyman karqan chayqa, Señor Diosqa manan uyariwanmanchu karqan.

¹⁹Diosmi ichaqa uyariwarqanpuni, mañakusqaytaqa uyariwarqanpunin.

²⁰¡Saminchasqa Diosqa kachun! Payqa mañakusqaytan uyariykuwarqan, payqa khuyapayawarqanpunin.