Read Quechua Cuzco Bible 1988 SALMOS 71 Bible Online

SALMOS 71 - Quechua Cuzco Bible 1988 bible

SALMOS 71

¹Señor Diosníy, pakaykukunaypaqmi hamuyki, ama hayk'aqpas p'enqachisqa kanayta munaychu.

²Qanqa chanin kasqaykirayku yanapaykuway kacharichiway, uyariykuway qespichiway.

³Qanqa pakaykukunay qaqay kay, pukarasqa llaqtay kay, chayman sapa kuti pakaykukunay, qanmi qespichiyta prometewarqanki. ¡Qanmi qaqaypas pukaraypas kanki!

⁴Diosníy, millay runamanta qespichiway, mana chanin yana alma runaq makinmanta horqoway.

⁵Qollana Señor Diosníy, qanmi suyakunayqa kanki, wayna kasqaymantan qanman hap'ipakamuni.

⁶Qanmi nacechimuwarqanki, nacesqaymantapachan qanman q'emiykukurqani, qantan yupaychallasqaykipuni.

⁷Askhan ñoqamanta utirayanku, qanmi ichaqa allin pakakunay kanki.

⁸Qanmanmi maytapuni takiykushani, p'unchay-ch'isiyaqmi qanta qhapaqchaspay takishani.

⁹Machuña kaqtiypas ama qhawarpariwaychu, kallpay pisiyapuqtinpas ama saqerpariwaychu.

¹⁰Awqaykunan ñoqamanta rimanakunku, wañuchiwayta munaqkunan kuska rimanakunku:

¹¹Diosmi payta saqerparipun, qatiykachasunchis hap'isunchis, manan pipas qespichiqnin kanchu, nispa.

¹²Diosníy, ama karunchakuwaychu, Diosnilláy, usqhamuy yanapaykuwanaykipaq.

¹³Awqaykunaqa p'enqachisqa atipasqa kachunku, mana allin kanayta munaqkunaqa asipayasqa k'uytuchisqa kachunku.

¹⁴Ñoqan ichaqa suyakushallasqayki, aswan-aswantataq yupaychasqaykipas.

¹⁵P'unchay-ch'isiyaqmi simiywan willarasaq chaninchapuwasqaykitapas qespichiwasqaykitapas. ¡Mana yupay atinan chaykunaqa!

¹⁶Qollana Señor Diosníy, ancha musphanakuna ruwasqaykitan willakusaq, qanlla chanin kasqaykitan rimarisaq.

¹⁷Diosníy, wayna kasqaymantapachan yachachiwarqanki, kunankamataqmi musphana ruwasqaykikunata willashani.

¹⁸Diosníy, machullaña soqo umallaña kashaqtiypas ama saqerpariwaychu, kunan wiñaymanpas qhepa wiñaymanpas ancha atiyniykitaqa willasaqraqmi.

¹⁹Diosníy, chaninchayniykin hanaq pachakama chayan. Qanmi musphanakunata ruwarqanki, manan pipas qan hinaqa kanchu.

²⁰Askha llaki-phutiytan rikuchiwarqanki, chaypas kawsarichiwankiraqmi, hallp'a sonqomantapas sayarichimuwankiraqmi.

²¹Astawanmi hatunchaykuwanki, huk kutitawanraqmi sonqochaykuwanki.

²²Diosnilláy, qanqa hunt'aqmi kanki, chaymi arpata tocaspa takipusqayki. Israelpa Ch'uya Diosnin, tawtinkuwan takispa yupaychasqayki.

²³Yupaychayta takispaymi kusisqallaña qaparisaq, qespichiwasqaykimantan tukuy sonqo takisaq.

²⁴Qalluypas chaninchapuwasqaykitan rimarishallanqapuni, mana allin kanayta munaqkunaqa p'enqachisqa atipasqa kasqankurayku.