Read Quechua Cuzco Bible 1988 SALMOS 72 Bible Online

SALMOS 72 - Quechua Cuzco Bible 1988 bible

SALMOS 72

¹Salomonpa takin Diosníy, chaninchayniykita reyman yachachiy, reypa churinman kuskachayniykitapas yachachiy,

²chaninchaywan llaqtaykita kamachinanpaq, kuskachaywan wakcha runaykikunata kamachinanpaq.

³Orqokuna llaqtapaq sumaq kawsayta paqarichichun, moqokunapas llaqtapaq saminchayta rikhurichichun.

⁴Reyqa wakchakunapaq chaninchachun, mana imayoqkunata qespichichun, alqochaqkunatapas t'ustuchun.

⁵Intipas killapas k'anchashanankaman llaqtaykiqa wiñaylla manchakusunkiku.

⁶Reyqa ichhusqa q'achupaq para hina kachun, hallp'ata qarpaykuq sulla hina kachun.

⁷Kamachikusqan p'unchaykunapi chanin runa t'ikarichun, sumaqllaña kawsaypas hunt'aykuchun manaña killaq k'anchanankama.

⁸Reyqa mama qochamanta huk mama qochakaman kamachinqa, Eufrates mayumanta teqsimuyu k'uchukamaraq kamachinqa.

⁹Ñawpaqenmanmi k'umuykukunqaku ch'inneqpi tiyaq runakunaqa, awqankunaqa pampakama k'umuykachisqan kanqaku.

¹⁰España suyu reykunapas qocha patapi tiyaqkunapas qokuykunatan apamunqaku. Sabá suyu Seba suyu reykunapas sumaq sonqokunatan haywarinqaku.

¹¹Llapa reykunan ñawpaqenpi qonqorikunqaku, llapa hatun suyukunan payta servinqaku.

¹²Reymi waqyakuqtin wakchata qespichin, mana pi yanapaykuqniyoq muchushaqtapas amachan.

¹³Mana piniyoqtapas wakchatapas khuyapayan, wakchakunaq kawsaynintapas qespichin.

¹⁴Alqochaymantapas sarunchaymantapas paykunataqa qespichinmi, paypaqqa kawsayninkuqa ancha chaniyoqmi.

¹⁵¡Reyqa kawsachun! Sabá qorita payman qochunku. Paypaqqa Diosmanta mañapullachunkupuni, payqa Diospa saminchasqallanpuni kachun.

¹⁶Suyupi askhallaña trigo kachun, orqo patakunapi askhallaña aytikuchun, rurunqa Libanopi hina phutuchun, campo qora hinataq llaqtakunapas runa hunt'a kachun.

¹⁷Wiñay-wiñaypaq sutinqa kachun, intiq k'anchashanankamaqa mentasqallapuni kachun. Llapa teqsimuyu suyukunaqa: Payta hina saminchawayku, nichunku. Llapa hatun suyukunaqa: Kusisamiyoqmi payqa, nichunku.

¹⁸Saminchasqa kachun Diosninchisqa, yupaychasqa kachun Israelpa Diosnin Señorqa, payllan utirayanakunata ruwan.

¹⁹Qhapaq sutinqa wiñay-wiñaypaq saminchasqa kachun, kay pachantinman lliphlli-kayninwan hunt'aykuchun. ¡Hinapuni kachun!

²⁰Isaipa churin Davidpa mañakusqankuna tukukapun.