Read Quechua Cuzco Bible 1988 SALMOS 73 Bible Online

SALMOS 73 - Quechua Cuzco Bible 1988 bible

SALMOS 73

¹Asafpa takin Allinpunin Diosqa Israelpaq, allinpunin ch'uya sonqoyoqkunapaq.

²Ñoqan ichaqa yaqa urmaykurqani, yaqallan llusk'aykurqani.

³Millaykunaq qhapaqyasqanta rikuspaymi hatunchakuqkunata envidiakurqani.

⁴Manan paykunaqa llakikunkuchu, qhalillapunin kanku.

⁵Manan runakuna hinapunichu muchunku, manan wakinkuna hinapaschu sasachaykunata rikunku.

⁶Chaymi anchaykachaywan walqakunku, millay-kaywanpas p'achakunku.

⁷Wirasapa kaqtinkun ñawinkupas p'uti-p'utiraq, millay yuyaykusqankupas sinchiyaykunmi.

⁸Asikuspan hukkunaman millayta rimanku, anchaykachaspan manchachinku.

⁹Hanaq pacha Dios contran rimanku, kay pachapipas anchaykachanku.

¹⁰Diospa llaqtanpas paykunamanmi rin, ima nisqankutapas chaskillankun.

¹¹Anchaykachaqkunataq ninku: ¿Diosri chayta yachanmanchu? ¿Qollana Diosri reparanmanchu? nispa.

¹²Chay hinan chay millay runakunaqa, chutarayaspallankun astawan qhapaqyaykunku.

¹³Yanqan sonqoyta ch'uyayachini, makiytapas tukuy mana allinmanta mayllikuni.

¹⁴P'unchay-ch'isiyaqmi muchuchiwarqanki, sapa paqartaq anyaykuwarqanki.

¹⁵Ñoqachus yuyaykuq-masinku kayman karqan chayqa, wawaykikunatan wasanchayman karqan.

¹⁶Ichaqa millay runaq qhapaqyasqanta entiendeytapuni munaqtiymi, sasallaña umaypaq karqan,

¹⁷Diospa ch'uya wasinman haykuspaymi paykunaq p'uchukayninta chayraq entienderqani.

¹⁸Paykunataqa llusk'anamanpunin churanki, wañunamanmi tanqaykunki.

¹⁹Qonqayllan chinkapunqaku, sinchi llaksasqan paykunaqa chiriyanqaku.

²⁰Señor Diosníy, imaynan mosqokusqaqa tutamanta chinkapun, ahinatan sayarimuqtiykiqa chinkapunku.

²¹Ñoqaqa haya sonqoyoqmi kasharqani, sonqoyqa k'utuwarqanmi.

²²Mana yuyayniyoqmi mana yachaqmi karqani, qanpaqqa uywa hinan kawsarqani.

²³Chaypas, ñoqaqa qanllawanpunin kasharqani, paña makiymantan hap'iykuwarqanki.

²⁴Yuyaychawaspaykin rampawanki, p'uchukaypitaq hatunchaspa chaskiwanki.

²⁵¿Piniytaq hanaq pachapi kashan? ¡Qanllan kashanki! Qanllawan kaspaymi manaña kay pachapi imatapas munanichu.

²⁶Yuyayniypas cuerpoypas p'iti-p'itinmanmi, Diosmi ichaqa sonqoyta kallpachaykuqniy, paymi wiñaypaq herenciaypas.

²⁷Qanmanta karunchakapuqkunaqa wañunqakupunin, qanmi wañuchinki pipas wasanchaqniykitaqa.

²⁸Ñoqapaq aswan allinqa Diospa qayllanpi kayniymi. Qollana Señorníy, qanmi pakakunayqa kanki, lliw ruwasqaykitan willakusaq.