Read Quechua Cuzco Bible 1988 SALMOS 77 Bible Online

SALMOS 77 - Quechua Cuzco Bible 1988 bible

SALMOS 77

¹Asafpa takin Kunkayoqtan Diosman waqyakuni, Diosman waqyakuni, paytaq uyarimuwan.

²Llakikusqay p'unchaymi Señor Diosmanta mañakuni, tutakuna mañakuspaymi payman makiytaqa haywarishallanipuni, manan almayqa sonqochakunñachu.

³Diosta yuyarispan anchini, yuyaymanaqtiymi sonqoy pisipan.

⁴Manan Diosqa puñurinayta munanchu, llakiq ñit'isqanmi kashani, manan rimayta atinichu.

⁵Ñawpa p'unchaykunatan yuyarini, ñawpa watakunatan yuyarini.

⁶Tuta takisqaykunatan yuyarini. Sonqoypi yuyaykuspaymi tapuykukuni:

⁷¿Wiñaypaqchu Señor Diosqa qesachawankuman? ¿Manañachu khuyapayawankuman?

⁸¿Manañachu munakuwankuman? ¿P'akinmanchu prometekusqanta?

⁹¿Diosqa qonqapunmanchu munakuyninta? ¿K'arak phiñasqachu manaña llakipayakuq kapun? nispa.

¹⁰Chaymantataq nini: Qollana Diosqa manan ñawpa hinañachu ruwan, chaymi llakichiwan, nispa.

¹¹Señor Diospa ruwasqankunatan yuyarisaq, ñawpa p'unchaykunapi Señor Diospa musphana ruwasqankunatan yuyarisaq,

¹²tukuy ruwasqantan yuyapasaq, ruwasqankunatan yuyaymanasaq.

¹³Diosníy, ch'uyakaman ruwayniykikunaqa, ¿ima diostaq qan hina hatun Diosri?

¹⁴Qanmi musphanakuna ruwaq Diosqa kanki, hatun suyukunapin atiyniykita rikuchirqanki.

¹⁵Atiyniykiwanmi llaqtaykita kacharichimurqanki, Jacobpa Josepa wawankunata qespichimurqanki.

¹⁶Diosníy, mama qochan rikurqasunki, unun rikuspasuyki khatatatarqan, unu ukhukunaraqmi chukchurqan.

¹⁷Phuyukunan lloqllay-lloqllata paramurqan, hanaqmantan kunununumurqan, hinantinpin lliphllikirqan.

¹⁸Muyuq wayramantan q'aqyaqemurqanki, lliphllikichisqaykikunan kay pachata k'anchaykamurqan, kay pachan sinchita chhaphchikurqan.

¹⁹Mama qochantan chimparqanki, askha ununtan purirqanki, ichaqa manan yupiykiqa rikhurirqanchu.

²⁰Moiseswan Aaronwanmi llaqtaykita ovejakunata hina pusachirqanki.