Read Quechua Cuzco Bible 1988 SALMOS 78 Bible Online

SALMOS 78 - Quechua Cuzco Bible 1988 bible

SALMOS 78

¹Asafpa takin Llaqtalláy, yachachisqayta uyariy, simi rimarisqayta maki uyariy.

²Rikch'anachiy simikunatan rimarisaq, ñawpamantaña mana yachasqakunatan sut'inchasaq.

³Uyarispayku yachasqaykutapas tayta-mamaykuq willawasqankutapas sut'inchasaqmi.

⁴Manan chaykunata wawaykuman pakasaqkuchu, aswanmi Señor Diospa atiynintapas musphana ruwasqantapas qhepa mirayman willasaqku.

⁵Diosmi Jacobpaq kamachikuy simita churarqan, Israelpitaq imaymana kawsanata churarqan, machulanchiskunatan kamachirqan chayta wawankuman yachachinankupaq,

⁶nacenqaku chay wawakuna chayta yachanankupaq, paykunapas chayta wawankuman yachachinankupaq.

⁷Chaymi Diosman sonqollikunqaku, manan ruwasqankunatapas qonqapunqakuchu, kamachikusqankunatapas hunt'anqakun.

⁸Manan machulanku hinachu kanqaku, mana kasukuq k'ullukuna, maynillanpi munakuq sonqoyoqkuna, Diosta wasancharpariqkuna.

⁹Efraín ayllu runakunan allin wach'iqkuna kashaspankupas awqa-tinkuy p'unchaypi kutirikapurqanku.

¹⁰Manan Dioswan rimanakusqankuta hunt'arqankuchu, manan yachachikuyninkunata kasuytapas munarqankuchu.

¹¹Paypa ruwasqantan qonqapurqanku, chay paykunaman rikuchisqan musphana ruwasqankunata.

¹²Machulankuq qayllanpin Diosqa utirayanakunata ruwarqan, Egipto suyu Zoán pampapi.

¹³Iskaymanmi mama qochata t'aqarqan, hinaspan unuta perqata hina sayachispa chayninta paykunata chimpachirqan.

¹⁴P'unchaymi paykunata phuyuwan pusarqan, tutataq nina k'anchaywan pusarqan.

¹⁵Qaqakunatan ch'inneqpi ch'eqtarqan, mayuta hinan unuta phawachirqan.

¹⁶Diosqa qaqamantan unuta phullpuchimurqan, mayuta hinan unuta phaqchachimurqan.

¹⁷Chaypas paykunaqa Dios contran huchallikushallarqankupuni, Qollana Dios contran ch'inneqpi hatarirqanku.

¹⁸Munasqanku mikhunata mañakuspankun Diosta sonqonkupi wateqarqanku.

¹⁹Dios contran rimarqanku: ¿Diosri ch'inneqpi mikhunata mast'apuwasunmanchu?

²⁰Arí, payqa qaqatan ch'eqtarqan, chay qaqamantan mayu hinaraq unu phullpumurqan, hinaspan pampantin qochayaykurqan. Chayri, ¿t'antatapas aychatapas llaqtanman qollanmantaqchu? nispanku.

²¹Chaymi chayta uyarispa Señor Diosqa phiñakurqan, Jacob contra nina hina rawrarirqan, Israel contra k'arakta phiñakurqan.

²²Manan Diospi iñirqankuchu, manallataq yanapayninpipas creerqankuchu.

²³Chaypas, Diosmi hanaq pachata kamachirqan punku kicharikunanpaq,

²⁴Manna nisqa mikhunatan parachimurqan mikhunankupaq, hanaq pacha mikhuytan qomurqan.

²⁵Angelkunaq t'antantan runa mikhurqan, saksanankukaman Diosqa mikhunata qorqan.

²⁶Hanaq pachapin inti lloqsimuy wayratapas uray wayratapas atiyninwan wayrachimurqan,

²⁷paykunapaqmi aychata ñut'u hallp'ata hinaraq parachimurqan, phalaq animalkunatan mama qocha aqota hinaraq rikhurichimurqan.

²⁸Chaykunatan karpa-karpaman chayachimurqan, tiyananku muyuriqmanpas urmaykachimurqan.

²⁹Saksanankukamaraqmi mikhurqanku, chhaynatan Diosqa munapakusqankuta qorqan.

³⁰Ichaqa manan munapakusqankuwan amikurqankuchu, simillankupiraq mikhunaqa hunt'a kashaqtinmi,

³¹Diosqa k'arakta paykunapaq phiñakurqan, aswan kallpasapakunatan wañurqarichirqan, Israelpi aswan allinninkunatan sipirqarirqan.

³²Chaypas huchallikurqankuraqmi, manan musphana ruwasqankunatapas creerqankuchu.

³³Chaymi samayta hinalla Diosqa kawsayninkuta qechurqan, muchuypin qonqaylla paykunata wañuchirqan.

³⁴Wakinninkuta Dios wañuchiqtinqa, paymanmi wakinqa kutirikapurqanku, yuyayta hap'ispankun paymanta tukuy sonqo mañakurqanku.

³⁵Paykunan yuyarirqanku Dios pakaykuqninkuqa kasqanta, Qollana Dios kacharichimuqninkupas kasqanta.

³⁶Ichaqa siminkuwanmi llunk'upayarqanku, qallunkuwantaq q'oturqanku,

³⁷manan paypaq sut'i sonqochu karqanku, manallataq rimanakuyninpipas hunt'aqchu karqanku.

³⁸Diosmi ichaqa khuyapayakuq kaspa huchallikusqankuta pampachaq, manataq paykunata tukurparirqanchu. Askha kutin mana phiñakurqanchu, mayninpiqa pisillatan phiñakurqan.

³⁹Runalla kasqankutan yuyarirqan, ripuspa mana kutimuq wayra hinalla kasqankuta.

⁴⁰¡Hayk'a kutitan ch'inneqpi payta mana kasurqankuchu! ¡Hayk'a kutitan chay ch'aki purunpi payta llakichirqanku!

⁴¹Yapapas-yapan Diostaqa wateqarqanku, Israelpa Ch'uya Diosnintan phiñachirqanku.

⁴²Manan atiyninta yuyarqankuchu, manallataq awqankumanta qespichimusqan p'unchaytapas yuyarqankuchu,

⁴³chaypachan Egipto suyupi utirayanakunata ruwarqan, Zoán pampapi musphanakunata ruwarqan.

⁴⁴Mayunkutapas yawarman tukuchirqan, hinan Egipto runakunaqa mana ukyayta atirqankuchu.

⁴⁵Paykunamanmi tankaylluta wakwaykachirqan, chaykunan paykunata kanirqan, hinallataq k'ayratapas wakwaykachirqan, chaykunan hallp'ankuta waqllichirqan.

⁴⁶Cosechankutapas kurumanmi qaraykurqan, llank'asqankutapas langostawanmi mikhuchirqan.

⁴⁷Chikchiwanmi uvas chakrankuta saqtachirqan, higos sach'ankutapas qasawanmi qasachirqan.

⁴⁸Chikchiwanmi wakankuta wañuchirqan, ovejankutapas illapawanmi sipichirqan.

⁴⁹Diosmi sinchitapuni paykunata muchuchirqan, k'arakta phiñakuspa, rawraqta phiñakuspa, paymi angelninkunata kacharqan wañuchimunankupaq.

⁵⁰Payqa phiñakurqanpunin, manan kawsayninkuta wañuymanta hark'arqanchu, aswanmi paykunata onqoywan wañuchirqan.

⁵¹Egiptopin llapa phiwita wañuchirqan, llapa kurak qhari wawakunata Kam miray karpakunapi wañuchirqan.

⁵²Hinaspan Israel runakunata oveja t'aqata hina horqomurqan, llaqtantan ch'inneqninta pusamurqan.

⁵³Waqaychaspanmi paykunata pusamurqan, chaymi mana manchakurqankuchu, awqankutataq ichaqa mama qocha p'ampaykurqan.

⁵⁴Ch'uya hallp'anmanmi llaqtanta pusampurqan, paypa hap'isqan orqo-orqomanmi chayachimpurqan.

⁵⁵Israelpa qayllanmantan hatun suyukunata wikch'urqan, sorteaspan ayllunkuman hallp'ata rakirqarirqan, hinaspanmi paykunata tiyanankupi tiyachirqan.

⁵⁶Paykunataq ichaqa Qollana Diosta wateqarqanku phiñachirqanku, manataq kamachikusqan simikunata kasurqankuchu,

⁵⁷aswanpas mana hunt'aqmi kapurqanku, machulanku hinan awqa sayarirqanku, mana allin ruwasqa p'eqta hinan waqllipurqanku.

⁵⁸Orqo patapi yupaychana cheqaswanmi payta phiñachirqanku, idolokunata yupaychaspan payta phiñachirqanku.

⁵⁹Diosmi chayta rikuspa phiñakurqan, hinaspan Israelmanta hukpaqkama t'aqakapurqan.

⁶⁰Silopi kaq tiyanantapas saqepurqan, runakuna chawpipi tiyasqan karpata.

⁶¹Awqanwanmi rimanakuynin cajata qechuchirqan, qhapaq atiynin rikch'aytan hap'ichirqan.

⁶²Anchatapunin llaqtanpaq phiñakurqan, awqaq espadanmanmi paykunata qaraykurqan.

⁶³Waynakunan kanasqa wañurqanku, sipaskunapaqtaq casarakuy takita manaña takirqankuchu.

⁶⁴Sacerdotekunan espadawan sat'isqa wañurqanku, viudankutaq mana waqarqankuchu.

⁶⁵Chaypachan Señor Diosqa puñuymanta hina rikch'arirqan, vinowan loqheyaq kallpasapa hina,

⁶⁶hinaspanmi awqankunata atipaspa ayqechirqan, wiñaypaqmi paykunata p'enqachirqan.

⁶⁷Josepa miraynintapas manan munarqanchu, Efraín ayllutapas manan akllakurqanchu,

⁶⁸aswanmi Judá aylluta akllakurqan, munakusqan Sión orqotapas akllakurqan.

⁶⁹Ch'uya wasintan wasichachirqan hatun hanaq pachata hina, wiñaypaq takyachisqan kay pachata hina.

⁷⁰Oveja michiq kamachin Davidtan akllakurqan,

⁷¹uñayoq oveja michinamanta waqyamurqan llaqtan Jacobta qhawananpaq, herencian Israelta michinanpaq.

⁷²Davidqa chanin sonqonwanmi paykunata michirqan, allin yachaq makinwanmi paykunata kamachirqan.