Read Quechua Cuzco Bible 1988 SALMOS 86 Bible Online

SALMOS 86 - Quechua Cuzco Bible 1988 bible

SALMOS 86

¹Davidpa mañakusqan Señor Diosníy, llakisqan wakchan kashani, makilla uyariykuway.

²Qan sonqon kani, waqaychaykuway, kay k'askaykukuqniyki kamachiykita qespichiway. Qanmi Diosníy kanki,

³Señor Diosníy, khuyapayaykuway, p'unchay-ch'isiyaqmi waqyakamuyki.

⁴Señor Diosníy, kay kamachiykiq sonqonta kusirichiy, qanmanmi mañakamuyki.

⁵Señor Diosníy, qanqa sumaqmi hucha pampachaykuqmi kanki, llapa waqyakuqniykikunatan mana p'itiyta munakunki.

⁶Señor Diosníy, mañakamusqayta uyariykuway, yanapaykuwanaykipaq mañakamusqayta uyariykuway.

⁷Waqyakamuqtiymi kutichimuwanki, chaymi llaki phutiyniy p'unchaypi waqyakamuyki.

⁸Señor Diosníy, manan dioskuna ukhupi qan hina Diosqa kanchu. ¡Manan imapas ruwasqaykikuna hinaqa kanchu!

⁹Señor Diosníy, llapa hatun suyukunatan ruwarqanki, chaykunan yupaychanasuykipaq hamusunkiku, sutiykitapas qhapaqchanqakun.

¹⁰Qan sapallaykin Diosqa kanki, qanqa hatunmi kanki, qanqa utirayanakunatan ruwanki.

¹¹Señor Diosníy, ñanniykita yachachiway cheqaq-kayniykipi purinaypaq. Qanta tukuy sonqo serviqta ruwaway.

¹²Señorníy, Diosníy, tukuy sonqoywanmi graciasta qomusqayki, sutiykitapas qhapaqchallasaqpunin.

¹³Anchatapunin ñoqata munakuwanki, Wañuy-pachamantan qespichiwarqanki.

¹⁴Diosníy, anchaykachaqkunan awqay hatarinku, huñunasqa yana alma runakunan wañuchiyta munawanku, manataqmi manchakusunkikuchu.

¹⁵Qanmi ichaqa, Señor Diosníy, sumaq sonqo, llakipayakuq Dios kanki, mana usqhay phiñakuqmi kanki, munakuqllaña, hunt'aqllaña kanki.

¹⁶Qhawarimuway, khuyapayaykuway, kay kamachiykita kallpachaykuway, warmi kamachiykiq wawanta qespiykachiway.

¹⁷Señor Diosníy, sumaq sonqo kaspayki señalta rikuchiway, cheqnikuwaqniykunan p'enqakunqaku, sonqochaykuwasqaykita rikuspanku, yanapaykuwasqaykita yachaspanku.