Read Quechua Cuzco Bible 1988 SALMOS 88 Bible Online

SALMOS 88 - Quechua Cuzco Bible 1988 bible

SALMOS 88

¹Hemanpa takin Señor Diosníy, qespichiwaqniy Diosníy, tuta p'unchaymi yanapayniykita mañakamuyki.

²¡Mañakamusqayta chaskiykuway! ¡Waqyakamusqayta uyariykuway!

³Sinchitapunin mana allin ñit'iykushawan, Wañuy-pachamanñan haykuykushani.

⁴Aya p'ampanaman wantuykusqakunawan qhawasqañan kashani, laqhollañan kapushani.

⁵Ayakuna ukhupi wikch'usqan kashani, wañuchisqa p'ampasqakuna hinan kashani, paykunatan manaña yuyarinkiñachu, manañan yanapaykunkiñachu.

⁶Wañuy t'oqomanmi wikch'uykuwarqanki, laqhayaqmanmi ukhu pachamanmi wikch'uykuwarqanki.

⁷k'araktan phiñariwarqanki, tukuy phoqchiqeqniykiwantaq chinkaykachiwarqanki.

⁸Reqsisqaykunatan ñoqamanta karuncharqanki, paykunawanmi millachiwarqanki. Wisq'aykusqan kashani, manan lloqsiyta atinichu,

⁹sinchita waqaspaymi ñawsayapushaniña. Señor Diosníy, sapa p'unchaymi waqyakamuyki, makiytan mast'arimuyki.

¹⁰¿Wañusqakunapaq musphanakunata ruwawaqchu? ¿Wañusqakunari yupaychanasuykipaq sayarimunkumanchu?

¹¹¿Munakuyniykimanta aya p'ampanapi willankumanchu? ¿Cheqaq-kayniykimantapas chinkay-pacha ukhupi willakunmanchu?

¹²¿Musphana ruwasqaykikunata pipas wañuy laqhayaqpi reqsinmanchu? ¿Chanin-kayniykitapas imaymana qonqana pachapi reqsinmanchu?

¹³Señor Diosníy, ñoqan ichaqa qanta waqyakamuyki, tutamantan mañakamuyki.

¹⁴Señor Diosníy, ¿imanaqtintaq wikch'uwanki? ¿Imanaqtintaq mana qhawarimuwankichu?

¹⁵Wayna kasqaymantapachan llakikuni yaqa-yaqa wañuni, manchachiwasqaykitan muchuni, manan muchuyta atiniñachu.

¹⁶K'arak phiñakuyniykin atiykuwan, manchachiwasqaykin ñit'iwan,

¹⁷millp'uq unu hinan muyuykushallawanpuni, huk-nisqallan ch'unkukamuwan.

¹⁸Reqsinakuq-masiytawan puriq-masiytawanmi qayllaymanta karunchawarqanki, kunanqa laqhayaqllapiñan kapushani.