Read Quechua Cuzco Bible 1988 SALMOS 89 Bible Online

SALMOS 89 - Quechua Cuzco Bible 1988 bible

SALMOS 89

¹Etanpa takin Señor Diosníy, munakuq kasqaykita takishallasaqpuni, hunt'aq kasqaykitan willakushallasaqpuni.

²Munakuyniykiqa wiñaypaqmi takyan, hanaq pacha hinan hunt'aq-kayniykiqa takyan, chaytaqa allintapunin yachani.

³Qanmi nirqanki: Akllakusqay reywanmi rimanakurqani, kamachiy Davidmanmi prometerqani:

⁴Wiñay-wiñaypaqmi mirayniykikunata takyachini, kamachikuy tiyanaykipin kamachikushallanqapuni, nispa.

⁵Señor Diosníy, hanaq pachan musphana ruwasqaykikunata takin, hunt'aq-kayniykitan ch'uyakunaq huñunakuyninpi takinku.

⁶¡Manan pipas hanaq pachapi Señor Dios hinaqa kanchu! ¡Manan pipas dioskunaq wawankuna ukhupi Señor Dios hinaqa kanchu!

⁷Diosníy, hatun huñunakuypi ch'uyakunan manchakusunkiku, sinchi manchakuymi hayk'an muyuriqniykipi kaqkunapaq kanki.

⁸Tukuy-atiyniyoq Señor Diosníy, manan pipas qan hina atiyniyoqqa kanchu, Señor Diosníy, tukuypin hunt'aqllapuni kanki.

⁹Qanmi mama qochaq phiñakusqanta samp'ayachinki, sayarimusqan phoqchiqesqankunatapas sayachinki.

¹⁰Qanmi ayata hina mama qocha phiña animal Rahabta sarurparirqanki, kallpasapa makiykiwanmi awqaykikunata ch'eqechirqanki.

¹¹Hanaq pachapas kay pachapas qanpakaman, qanmi teqsimuyutapas kamarqanki, chaypi tukuy imaymanatapas ruwarqanki.

¹²Qanmi wichaytapas uraytapas kamarqanki. Tabor orqopas Hermón orqopas kusisqallañan qanman takinku.

¹³Kallpasapan makiykiqa, atiyniyoqmi atipaqmi paña makiykiqa.

¹⁴Chaninchaspan allinta ruwaspan kamachishallankipuni, mana p'itiy munakuywan hunt'aq-kaywanmi puriysisunki.

¹⁵Señor Diosníy, kusisamiyoqmi fiestapi kusisqa yupaychamuqniyki llaqtaqa, kusisamiyoqmi k'anchayniykiq k'anchaykusqan puriqqa,

¹⁶qanwanmi kusikushallanpuni, chaninchayniykiwantaq q'ochukun.

¹⁷Qanmi may allintapuni llallichiwankiku, munakuwaspaykikun atipachiwankiku.

¹⁸Señor Diosníy, qanmi hark'aykuqniykuta akllakurqanki, Israelpa ch'uya Diosnin, qanmi reyta churapuwarqankiku.

¹⁹Chaypachan hunt'aq kamachiykikunaman rikhuriypi rimapayaspa nirqanki: Llaqtay ukhumantan huk kallpasapata yanaparqani, llaqtay ukhumanta akllakusqaytan hatuncharqani.

²⁰Kamachiy Davidtan tarirqani, ch'uya aceiteywanmi rey kananpaq hawirqani,

²¹paytaqa yanapashallasaqpunin, atiyniywanqa kallpachashallasaqpunin.

²²Manan awqankunaqa payta llallinqachu, manan millay runakunaqa payta atipanqachu.

²³Aswanpas ñawpaqenpin awqankunata sarusaq, pay cheqnikuqkunatan sipisaq.

²⁴Paytaqa munakushallasaqpunin, paypaqqa hunt'ashallasaqpunin, llallinanpaqqa yanapashallasaqpunin.

²⁵Kamachikuynintapas hatunyachisaqmi mama qochamanta Eufrates mayukama.

²⁶Paymi waqyakamuwanqa: Qanmi taytayqa kanki, qespichiwaqniy hark'aykuwaqniy kanki, Diosniymi kanki, nispa.

²⁷Ñoqataq phiwi churiyman payta tukuchisaq, kay pacha reykunaq qollananman tukuchisaq.

²⁸Mana p'itiytan payta munakusaq, paywan rimanakusqaypas allintan takyanqa.

²⁹Mirayninkunataqa wiñaypaqmi takyachisaq, kamachikuynintaqa hanaq pachata hinan takyachisaq.

³⁰Wawankunataqchus yachachisqay simita saqepunqaku, manataq kamachisqay simikunaman hinachu kawsanqaku,

³¹kamachikuyniykunatachus sarunchakunqaku, manataq kamachikusqaykunata kasunqakuchu chayqa,

³²mana kasukusqankumantan k'aspiwan wanachisaq, huchallikusqankumantan hasut'iwan muchuchisaq.

³³Chaypas Davidtaqa munakushallasaqpunin, paypaqqa hunt'ashallasaqpunin.

³⁴Manan rimanakusqaytaqa yanqayachisaqchu, manan rimarisqaytaqa p'akisaqchu.

³⁵Huk kutillatan wiñaypaq ch'uya-kayniypi prometerqani: Manan Davidman llullakusaqchu, nispa.

³⁶Mirayninkunataqa wiñaypaqmi takyachisaq, kamachikuyninqa intiq k'anchashanankaman kashallanqapuni.

³⁷Killa hinan wiñaypaq takyanqa, hanaq pacha chay cheqaq testigo hinan kanqa, nispa.

³⁸Chaypas kunanqa hawisqayki reytan wikch'urqanki pisicharqanki, paypaqmi phiñakurqanki.

³⁹Kamachiykiwan rimanakusqatan p'akirqanki, coronantan pampaman wikch'urqanki.

⁴⁰Llapa perqantan q'asarqanki, pukarankunatan soqyaman tukuchirqanki.

⁴¹Ñanta hayk'an puriqkunan ima munasqankuta llat'ananku, qorpan suyukunan payta asipayanku.

⁴²Awqankutan atipachirqanki, llapa awqankutan kusichirqanki.

⁴³Ñawch'i espadantan hallmuyachirqanki, awqa-tinkuypin mana kallpacharqankichu.

⁴⁴Qhapaq-kaynintan chiriyachipurqanki, kamachikuy tiyanantan pampaman wikch'urqanki.

⁴⁵Waynallaraq kamachikushaqtan qolluchirqanki, ahinatan payta sinchita p'enqachirqanki.

⁴⁶Señor Diosníy, ¿hayk'aqkamataq pakakunki? ¿Wiñaypaqchu pakakunki? ¿Nina hinachu k'arak phiñakusqayki rawrashallanqapuni?

⁴⁷Señor Diosníy, mana unaypaq kasqayta yuyariy. ¿Yanqapaqchu runataqa kamarqanki?

⁴⁸¿Pi runataq mana wañuspa kawsanqa? ¿Wañuy-pachaq atiyninmanta kawsayninta kacharichinqachu?

⁴⁹Señor Diosníy, ¿maytaq ñawpa munakuyniykiri? ¿Maytaq Davidman prometesqayki hunt'aq-kayniykiri?

⁵⁰Señor Diosníy, yuyariy imaynatachus kamachiykita k'amiwasqankuta, askhallaña mana iñiyniyoqkunaq k'amiwasqankutan muchushani.

⁵¹Señor Diosníy, chhaynatan awqaykikunaqa k'amiwanku, chhaynatan akllakusqayki reyta ñataq-ñataq k'aminku.

⁵²Wiñaypaq Señor Diosqa saminchasqa kachun. ¡Hinapuni kachun!