Read Quechua Cuzco Bible 1988 SALMOS 90 Bible Online

SALMOS 90 - Quechua Cuzco Bible 1988 bible

SALMOS 90

¹Dios sonqo runa Moisespa mañakusqan Señor Diosniyku, qanmi watan-watan pakakunaykuqa kanki.

²Manaraq orqokunapas rikhurimushaqtin, manaraq teqsimuyuntinpas kashaqtin, qanmi wiñaymanta wiñaykama Diosqa kanki.

³Runatan ñut'u hallp'aman tukuchinki: Ñut'u hallp'aman tukuychis, nispayki.

⁴Qanpaqqa waranqa wataqa chinkaripuq qayna p'unchay hinallan, tutapi huk puñuriy hinallan.

⁵Runakunatan unu lloqlla hina apanki, paykunataq pasaqpaq puñupunku. Paykunaqa qholla q'achu hinan kanku,

⁶tutamanta wiñarimuspan t'ikarin, llanthu wikch'uqtintaq naq'espa ch'akipun.

⁷Phiñakusqaykin tukupushawanku, k'arak phiñakusqaykin manchachishawanku.

⁸Huchaykutan ñawpaqeykipi rikhurichinki, pakalla huchallikusqaykutan qayllaykipi rikhurichinki.

⁹K'arak phiñakusqaykiwanmi kawsasqayku p'unchaykuna chinkaripushan, kawsasqayku watakunan samariyllawan tukukapun.

¹⁰Qanchis chunka watallan kawsayku, kallpasapakunataq pusaq chunkakama chayayku, chaypas, chay watakunapiqa uma nanayllan, sasa kawsayllan. Usqhayllan watakunaqa ripushan, ñoqaykupas phawaripushaykun.

¹¹¿Pitaq ancha k'arak phiñakusqaykita reqsin? Qanmi manchakunaykuqa kanki, chayri, ¿pitaq yuyan mana manchakuqniykikunapaq mana phiñakusqaykita?

¹²Kawsasqayku p'unchaykuna allin yupayta yachachiwayku, sonqoykupi yachayniyoq kanaykupaq.

¹³¡Señor Diosniyku, kutirimuwayku! ¿Hayk'aqkamataq mana usqhamunkichu? ¡Kay kamachiykikunata llakipayaykuwayku!

¹⁴Mana p'itiy munakuyniykiwan sapa paqar hunt'aykuwayku, chaymi tukuy kawsasqayku p'unchay kusisqa q'ochukusaqku.

¹⁵Llakichiwasqaykiku watakunaman hina unay watata kusichiwayku.

¹⁶Kamachiykikunamanpas ruwasqaykikunata rikuchiwayku, qhapaq atiyniykitapas wawaykuman rikuchiy.

¹⁷Señor Diosniyku, sumaqta qhawarimuwayku. ¡Llank'asqaykuta allinta sayachiy! ¡Arí, llank'asqaykuta allinta sayachiy!