Read Quechua Cuzco Bible 1988 SALMOS 91 Bible Online

SALMOS 91 - Quechua Cuzco Bible 1988 bible

SALMOS 91

¹Qollana Diospa pakaykusqan tiyaqqa, Tukuy-atiyniyoqpa llanthuykusqan tiyaqqa

²Señor Diostan ninman: Qanqa yanapaykuwaqniymi kanki, pukaraymi, hap'ipaykukunay Diosmi, nispa.

³Paymi qespichisunki pakallapi toqllachasqamantapas wañuchiq onqoymantapas.

⁴Raphranwanmi qataykusunki, chaypin pakaykukunki, hunt'aq-kayninwanmi waqaychasunkipas amachasunkipas.

⁵Aman tuta manchachiqta manchapakunkichu, aman p'unchay wach'isqata manchakunkichu,

⁶aman laqhapi chayamuq onqoyta manchakunkichu, aman chawpi p'unchaypi mast'aq wañuyta manchakunkichu.

⁷Waranqa runan lloq'e ladoykipi wañunqa, chunka waranqa runataq paña ladoykipi, qanmi ichaqa qhalilla kakunki.

⁸Qanqa qhawayllan qhawarinki, millay runakunaq muchusqantan rikunki.

⁹Señor Diostan yanapaykunasuykipaq hap'ikurqanki, Qollana Diostan waqaychaykunasuykipaq hap'ikurqanki,

¹⁰chaymi ima mana allinpas mana chayamusunkichu, onqoypas manan wasiykiman haykunqachu.

¹¹Angelninkunatan Diosqa kamachipusunki mayta riqtiykipas waqaychanasuykipaq.

¹²Paykunaqa marq'asunkikun ama ima rumipipas misk'akunaykipaq.

¹³Leontapas viboratapas sarunkin, uña leontapas mach'aqwaytapas t'ustunkin.

¹⁴Diosmi nin: Sonqollikuwaqniykunatan qespichisaq, reqsiwaqniykunatan waqaychasaq.

¹⁵Waqyakamuwaqtinkun, paykunaman kutichimusaq, ñoqa kikiymi llaki-phutiypi paykunawan kashasaq, chaymantan qespichisaq, hinaspan paykunata hatunchaykusaq.

¹⁶Unaytapunin kawsachisaq, paykunataqa qespichispan kusichisaq, nispa.