Read Quechua Cuzco Bible 1988 SALMOS 92 Bible Online

SALMOS 92 - Quechua Cuzco Bible 1988 bible

SALMOS 92

¹Qollana Diosníy, ancha allinmi qanman graciasta qoyqa, ancha allinmi qanta yupaychaspa takiyqa.

²Ancha allinmi munakuyniykitapas tutamanta rimariyqa, hunt'aq-kayniykitapas ch'isinta willakuyqa,

³arpata waqachispa tawtinkutapas sumaqta tocaspa.

⁴Señor Diosníy, ruwasqaykikunawanmi kusirichiwanki, ruwasqaykikunamantan kusisqa takishani.

⁵Señor Diosníy, ¡may hatunmi ruwasqaykikunaqa! ¡Mana taripay atiymi yuyaykusqaykikunaqa!

⁶Mana yuyayniyoqkunan kaytaqa mana yachanchu, pisi yuyayniyoqkunan kaytaqa mana reparanchu:

⁷Millay runakunachus qora hina phutumunku chaypas, tukuy mana chaninta ruwaqkunachus llanllarinku chaypas, wiñaypaq t'ustusqan kanqaku.

⁸Qanmi ichaqa, Señor Diosníy, ancha hatunchaykusqa kashanki.

⁹Señor Diosníy, cheqaqtapunin awqaykikunaqa wañunqaku, tukuy mana allinkaqta ruwaqkunaqa ch'eqechisqan kanqaku.

¹⁰Qanmi ichaqa salqa toroq kallpanwan hina kallpayta astawan kallpachaykuwarqanki, mosoq aceitewan umayman hich'aykuwarqanki.

¹¹Awqaykunaq imayna urmaykusqantan rikurqani, chay millay awqaykunaq qaparisqantan uyarirqani.

¹²Chanin runakunaqa palma sach'a hinan t'ikanku, Libanopi cedro sach'a hinan wiñanku.

¹³Señor Diospa wasinpi mallkisqan kanku, Diosninchispa pationkunapin t'ikanku.

¹⁴Yuyaqña kashaspapas rurunqakuraqmi, kallpallayoqpunin kashanqaku, llanllashallanqakupunin,

¹⁵chay hinapin, Señor Diospa chanin kasqanta willanqaku. Señor Diosqa ñoqapaq qaqa hinan, manan ima mana chaninpas paypiqa kanchu.