Read Quechua Cuzco Bible 1988 SALMOS 94 Bible Online

SALMOS 94 - Quechua Cuzco Bible 1988 bible

SALMOS 94

¹Señor Diosníy, qanmi ayni-kutichiq Diosqa kanki, awqakunata muchuchispa reqsichikuy.

²Qanmi kay pacha runakunata huchachaqqa kanki, anchaykachaqkuna contra sayarispayki aynita kutichiy.

³¿Hayk'aqkamataq millay runakunaqa kusirakunqaku? Señor Diosníy, ¿hayk'aqkamataq q'ochukunqaku?

⁴¿Hayk'aqkamataq anchaykachanqaku? ¿Hayk'aqkamataq chay millay ruwaqkunaqa k'ankaykachanqaku?

⁵Señor Diosníy, paykunaqa runaykikunatan t'ustunku, kaqniykikunatan k'umuykachinku.

⁶Viudakunatapas wak llaqtayoqkunatapas wañuchinku, mana tayta-mamayoqkunatapas sipinku.

⁷Ninkutaq: Manan Señor Diosqa rikushanpaschu, manan Jacobpa Diosninqa reparashanpaschu, nispa.

⁸Mana yuyayniyoq runakuna, reparaychis. Pisi yuyayniyoqkuna, ¿hayk'aqtaq entiendenkichis?

⁹Ninrita ruwaq Diosqa, ¿manachu uyarinqa? Ñawita ruwaq Diosqa, ¿manachu rikunqa?

¹⁰Hatun suyukunata anyaykuq Diosqa, ¿manachu muchuchinqa? Runata yachachiq Diosqa, ¿manachu yachanqa?

¹¹Señor Diosqa yachanmi runaqa yanqakunallata yuyaykuq kasqanta.

¹²Señor Diosníy, kusisamiyoqmi anyaykusqayki runaqa, kamachisqayki simita yachachisqayki runaqa,

¹³llakikuy p'unchaykuna chayamuqtinmi payqa samakunqa, millay runapaq aya t'oqota hasp'ipushanakama.

¹⁴Señor Diosqa manan runakunata wikch'urparinqachu, manallataqmi kaqninkunataqa saqerparinqachu.

¹⁵Chaypachan juezkunaqa chaninchayman hina wakmanta t'aqwinqaku, llapa chanin runataq chayta: Allinmi, ninqaku.

¹⁶¿Pin millay runakunamanta amachaykuwanqa? ¿Pin mana chanin ruwaqkunamanta hark'aykuwanqa?

¹⁷Manachus Señor Diosqa yanapaykuwanman karqan chayqa, ch'in Wañuy-pachapiñan kashayman karqan.

¹⁸Ñoqan nirqani: Llusk'aykushanin, nispa, chaypachan, Señor Diosníy, munakuwaspayki yanapaykamuwarqanki.

¹⁹Sonqoyta llakikuna ñit'iykushaqtinmi, qanqa sonqochaykuwanki kusirichiwanki.

²⁰¿Qanwanqa mana chanin juezkunaqa sonqota tupachinkumanchu? ¡Manapunin! Paykunaqa t'aqwiyninkutan mana chaninman tukuchinku.

²¹Paykunaqa chanin runa contran huñukunku, mana huchallikuqtan wañuchinapaq huchachanku.

²²Señor Diosmi ichaqa amachaykuwaqniy, Diosniyqa pakaykuwaqniy Qaqan.

²³Paymi paykunaman mana chanin ruwasqankuta kutichinqa, mana chanin ruwasqankumantan paykunata wañurqarichinqa, Señor Diosniykun paykunata wañurqarichinqa.