Read Quechua Cuzco Bible 1988 SALMOS 96 Bible Online

SALMOS 96 - Quechua Cuzco Bible 1988 bible

SALMOS 96

¹Mosoq takita Señor Diosman takiychis, llapa kay pachapi tiyaqkuna, Señor Diosman takiychis.

²Señor Diosman takiychis, payta saminchaychis, qespichiwasqanchista sapa p'unchay willaychis.

³Qhapaq atiyninta tukuy runakunaman willaychis, musphana ruwasqankunata llapa llaqtakunaman willaychis.

⁴Hatunmi Señor Diosqa, yupaychana hinapunin, llapan dioskunamanta aswan manchana.

⁵Llaqtakunaq llapan diosninqa idolon, Señor Diosmi ichaqa hanaq pachata kamaq.

⁶Paytaqa lliphlli-kaywan qhapaq-kaywanmi muyuykun, wasintaqa atiywan lliphlli-kaywanmi hunt'aykun.

⁷Llapa suyu ayllukuna, Señor Diosta niychis: ¡Qanmi qhapaqqa atiyniyoqqa kanki!

⁸¡Sutiykiqa qollananmi! nispa. Ofrendakunata apamuychis, yupaychana wasi patioman haykumuychis.

⁹Kay pachapi llapallan tiyaqkuna, ch'uya p'achantin Señor Diosman qonqoriykukuychis, paypa qayllanpi khatatataychis.

¹⁰Mana iñiyniyoq suyukunata niychis: ¡Señor Diosmi kamachikushan! nispa. Teqsimuyuqa allin takyachisqan, manataqmi kuyurinmanchu. Señor Diosmi llaqtakunata chaninchaspa kamachinqa.

¹¹¡Hanaq pacha kusikuchun, kay pachapas q'ochukuchun! ¡Mama qocha qaparichun, llapan chaypi kaqkunapas!

¹²¡Campokuna kusikuchun, llapan chaypi kaqkunapas! Sach'a-sach'api mallkikunan takinqaku, Señor Diospa ñawpaqenpi kusikuymanta takinqaku, Señor Diosmi hamushan kay pachata kamachinanpaq, paymi runakunata kuskachaspa kamachinqa, llaqtakunatapas cheqaqchaspa kamachinqa.