Read Quechua Cuzco Bible 1988 PROVERBIOS 1 Bible Online

PROVERBIOS 1 - Quechua Cuzco Bible 1988 bible

PROVERBIOS 1

¹Davidpa churin Salomonpa rikch'anachiy siminkuna, paymi Israel suyupi rey karqan. Kay rikch'anachiy simikunaqa

²yachaytawan yachachiytawan tarinapaqmi, ancha yachaywan rimasqakunata entiedenapaqmi,

³allin yachachisqa kaywan tanteaywan kawsanapaqmi, chaninkaqtapas, chaninchaytapas, k'apak-kaytapas ruwaspa,

⁴warmakunata yuyaysapaman tukuchinapaqmi, waynakunatapas yuyaychaspa yuyaykukuyta hap'ichinapaqwanmi,

⁵rikch'anachiy simitapas mana sut'i kaq simitapas, yachayniyoqkunaq simintapas watuchiyninkutapas entiendenapaqmi. Yachayniyoqpas chaykunata uyarispaqa aswan yachayniyoqmi kanqa, yuyayniyoqpas aswan allin yuyaychasqan kanqa.

⁷Yachayniyoq kanapaqqa ñawpaqtaraqmi Señor Diosta manchakuna, mana yuyayniyoqkunaqa pisipaqmi qhawarinku yachaytapas yachachiytapas.

⁸Churilláy, uyariy taytaykiq yachachiyninta, kasukullaypuni mamaykiq yachachisqasuykita,

⁹umaykipaq t'ika pillu hinan kanqa, kunkaykita sumaqchaq walqana hinan kanqa.

¹⁰Churilláy, huchasapakunachus wateqasunki chayqa, ama kasukuychu.

¹¹Paykunachus nisunkiku: Haku ñoqaykuwan, runata wañurqachinapaq suyapamusunchis, mana huchayoqta yanqapuni wañuchimusunchis.

¹²Wañuy-pacha hina kawsashaqta paykunata millp'uykusun, aya t'oqoman chinkaykuqta hina kaqtapacha oqoykusun.

¹³Imaymana qhapaq-kaytan tarisun, qechusqakunawan wasinchista hunt'achisun.

¹⁴Ñoqaykuman hinan qanmanpas tupasunki, llapallanchis huk bolsallayoq kasun, nispa chayqa,

¹⁵churilláy, ¡ama paykunawan puriysikuychu! Purinankumanta karunchakuy.

¹⁶Paykunaqa mana allinmanmi phawarinku, runata wañuchinankupaqmi usqhanku.

¹⁷Yanqapaqmi sipitata mast'akunqa phalaq animalkunaq rikushasqanqa,

¹⁸ichaqa paykunaqa kikinkupaqmi toqllata churakunku, toqlla churasqallankupitaqmi wañunqaku.

¹⁹Chay hinatan tukukun suwakuyman sonqollikuqqa, chay sonqollikuymi payta wañuchin.

²⁰Yachaymi callekunapi waqyakun, plazakunapi qaparin,

²¹askha runaq kasqankunapi waqyakun, llaqta haykuna punkukunapi chayasqa simikunata riman:

²²Yaw pisi yuyayniyoqkuna, ¿hayk'aqkamataq pisi yuyayman k'askakunkichis? Yaw asipayaqkunapas, ¿hayk'aqkamataq asipayaspa kusirakunkichis? Yaw mana yuyayniyoqkunapas, ¿hayk'aqkamataq yachayta cheqnikunkichis?

²³Anyaykuyniyta maki uyariwaychis, ñoqan yachayniyta mast'arimusqaykichis, simiykunatan yachachisqaykichis.

²⁴Waqyamurqaykichismi, manataq uyarimuyta munawarqankichischu, makiytan mast'arimurqaykichis, manataq pipas uyarimuwarqanchu.

²⁵Aswanmi llapa kunayniykunata qesacharqankichis, manan anyaykuyniytapas munarqankichischu.

²⁶Chaymi ñoqapas muchuqtiykichis asikusaq, hatun llaki chayamusuqtiykichispas asipayasqaykichis,

²⁷hatun llaki lloqlla hina chayamuqtin, muchunaykichispas muyuq wayra hina chayamuqtin, qankunaman llakipakuypas phutiypas chayamuqtin.

²⁸Chaypachan waqyakamuwankichis, manataqmi kutichimusqaykichischu, maskhawankichismi, manataqmi tariwankichischu.

²⁹Yachaytan cheqnikurqankichis, manan Señor Dios manchakuyta munarqankichischu.

³⁰Kunayniytan wikch'urqankichis, manan ima anyaykuyniytapas chaskirqankichischu.

³¹Chaymi imaynatachus kawsasqaykichista muchunkichis, yuyaykusqallaykichiswantaqmi amichikunkichis.

³²Pisi yuyayniyoqkunataqa pantasqallankutaqmi wañuchinqa, mana yuyayniyoqkunataqa mana llakhi kasqallankutaqmi wañuchinqa.

³³Uyariwaqniymi ichaqa mana ima nisqalla tiyanqa, mana imatapas manchakuspa kawsanqa.