Read Quechua Cuzco Bible 1988 PROVERBIOS 11 Bible Online

PROVERBIOS 11 - Quechua Cuzco Bible 1988 bible

PROVERBIOS 11

¹Señor Diosqa waqllisqa balanzatan cheqnikun, chanin pesanan ichaqa payta kusichin.

²Pipas anchaykachaqqa p'enqachisqan kapunqa, k'umuykukuqmi ichaqa yachayniyoq kapunqa.

³Chanin runakunataqa chanin-kaynillankutaqmi pusan, mana hunt'aqkunatan ichaqa iskay yuyaywan rimasqallankutaq waqllichin.

⁴Qhapaq-kaykunaqa taripay p'unchaypi manan yanapaykunqachu, chanin-kaymi ichaqa wañuymanta qespichin.

⁵Chanin runaq ñannintaqa chanin-kayninmi kuskachan, millay runatan ichaqa millay-kaynillantaq urmaykachin.

⁶Chanin runakunataqa chanin-kaymi qespichin, mana hunt'aqkunatan ichaqa munapakuynillantaq wataykun.

⁷Millay runa wañuqtinqa suyakusqanmi chinkapun, qhapaq-kaykunapi yuyarayasqanqa chinkapunmi.

⁸Chanin runaqa llaki-phutiymantan horqosqa kapun, millay runataq rantinpi haykun.

⁹Mana iñiyniyoq runaqa siminwanmi runamasinta k'irin, chanin runakunan ichaqa yachayninkuwan qespichikunku.

¹⁰Chanin runakuna allinyaqtinqa llaqtan kusikun, millay runakuna wañuqtintaq llaqta kusisqa qaparin.

¹¹Chanin runakunaq saminchanwanmi llaqta wiñarin, millay runakunaq simintaq llaqtata thunin.

¹²Mana yuyayniyoq runaqa runamasintan pisichan, allin reparaq runan ichaqa upallakun.

¹³Simi apaqa pakalla willasqakunatan willakun, willaykukuna hina runan ichaqa pakalla willasqakunata sonqollanpi hap'in.

¹⁴May suyupichus mana allin kamachikuy kaqtinqa, suyuqa waqllinmi, askhaq yuyaychayninwanmi ichaqa suyuqa allinta sayan.

¹⁵Llakiq ñit'isqanmi rikukunqa mana reqsisqa manukuqpaq fiakuqqa, fiakuyta mana munaqmi ichaqa mana llakipakuspa kawsan.

¹⁶Sumaq sonqo warmiqa yupaychasqan kanqa, mana khuyapayakuq runan ichaqa qhapaq-kaykunallata tarin.

¹⁷Llakipayakuq runaqa pay kikinpaqmi allinta ruwan, yana alma runan ichaqa pay kikinpaq mana allinta ruwan.

¹⁸Millay runaq ganasqanqa yanqapaqmi, chaninninpi ruwaqmi ichaqa cheqaq samiyoq.

¹⁹Chaninpuni kaqqa kawsanqapunin, mana allinkaqta ruwaqmi ichaqa wañunqapuni.

²⁰Señor Diosqa millakunmi waqllisqa sonqoyoqkunata, mana huchachanata kawsaqkunatan ichaqa sumaqta qhawarin.

²¹Cheqaqtapunin millay runaqa muchuchisqapuni kanqa, chanin runakunan ichaqa qespichisqa kanqa.

²²Imaynan khuchiq senqanpi qori anilloqa, chay hinan sumaq rikch'ayniyoq pisi yuyayniyoq warmiqa.

²³Chaninkunaq munasqanqa allinkaqllamanpunin tukun, millaykunaq suyakusqanmi ichaqa phiñakuyta sayarichin.

²⁴Kanmi qoykukuq runa, chaywanpas aswan kaqniyoqraqmi payqa, kallantaqmi mich'akuq runa, chaywanpas wakchayapunmi payqa.

²⁵Qoykukuq runaqa t'ikarinqan, hukman saksata ukyachiqqa saksa ukyachisqallataqmi kanqa.

²⁶Runakunan trigota payllapaq huñuqtaqa ñakan, trigota vendeqtan ichaqa saminchan.

²⁷Allinkaqta ruwayta munaqqa allin rikusqan kanqa, mana allinkaqta ruwayta munaqmanmi ichaqa mana allinkaq taripanqa.

²⁸Qhapaq-kayninman k'askakuqqa urmaykunqan, chanin runakunan ichaqa raphi hina llanllarinqaku.

²⁹Familianta sasaman churaqqa, mana imayoqmi kapunqa, mana yuyayniyoqqa yachayniyoqpa kamachillanpunin kanqa.

³⁰Chanin runaq kawsayninqa hukkunatan kawsarichin, yachayniyoqqa yanapaykunanpaq runakunatan maskhan.

³¹Chanin runachus kay pachapi saminta chaskin chayqa, ¡imaynataq huchasapa millay runari muchunanta mana chaskinmanchu!