Read Quechua Cuzco Bible 1988 PROVERBIOS 13 Bible Online

PROVERBIOS 13 - Quechua Cuzco Bible 1988 bible

PROVERBIOS 13

¹Yachayniyoq churiqa taytanpa anyaykusqantan chaskikun, k'ankaykachaqmi ichaqa anyaykusqanta mana uyarikunchu.

²Allin runaqa rimasqanman hinan samita chaskin, rimasqankuta mana hunt'aqkunan ichaqa maqarqoyllatapuni munan.

³Siminta waqaychaqqa pay kikintan waqaychakun, hawan ukhunta rimaqqa payllatataqmi waqllichikun.

⁴Qellaqa munapakunmi, manataqmi imatapas tarinchu, k'uchi runakunan ichaqa ima munasqankuta tarinku.

⁵Chanin runaqa llullakuytan cheqnikun, millay runan ichaqa p'enqachintaq pisichantaq.

⁶Chanin kayqa waqaychanmi mana huchachana kawsaq runataqa, mana chanin-kaymi ichaqa huchasapata urmaykachin.

⁷Kanmi qhapaqman tukuqkuna mana imayoq kashaspa, kallantaqmi wakchaman tukuqkuna askha kaqniyoq kashaspa.

⁸Qhapaqqa qhapaq-kayninwanmi kawsayninta qespichin, wakchatan ichaqa suwaqa mana manchapachinchu.

⁹Chanin runakunaqa lliphipishaq k'anchay hinan, millay runakunaq k'anchayninmi ichaqa wañupushan.

¹⁰Uma hoqariyqa ch'aqwaytapunin paqarichin, yuyaychaykuyta chaskikuyqa yachayniyoq-kaytan rikuchin.

¹¹Qonqaylla qhapaqyayqa manan unaypaqchu, pisi-pisimanta huñuqmi ichaqa qhapaqyan.

¹²Runaqa suyakusqan mana hunt'akuqtinmi llakikun, munasqan hunt'akuqtinmi ichaqa sonqon kawsarin.

¹³Kamachisqa simita pisichaqqa llakipin rikukunqa, kamachisqa simita kasuqmi ichaqa samiyoq kanqa.

¹⁴Yachayniyoqpa yachachikuyninqa kawsay pukyun, wañuy toqllamantan qespichin.

¹⁵Allin yuyaywan ruwaqqa sumaq qhawarisqan, siminkuta mana hunt'aqkunan ichaqa chinkapunqaku.

¹⁶Yuyayniyoq runaqa yachaywanmi ruwan, mana yuyayniyoqmi ichaqa mana umayoq-kayninta rikuchin.

¹⁷Mana allin kachapuriqa uma nanaykunatan paqarichin, hunt'aq kachapurin ichaqa allinkaqta paqarichin.

¹⁸Kunaykusqata pisichaqqa wakchayanqan, p'enqaypin rikukunqa, anyaykusqata kasuqmi ichaqa yupaychasqa kanqa.

¹⁹Munasqa hunt'akuqtinqa sonqotan kusichin, mana yuyayniyoqkunaqa millakunmi mana allinkaqta saqeyta.

²⁰Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa.

²¹Huchasapakunataqa mana allin-kaymi qatiykachan, chanin runakunan ichaqa allinta t'ikarinqa.

²²Allin runaqa nietonkunamanmi herenciata saqen, huchasapaq qhapaq-kaynintan ichaqa chanin runa chaskinqa.

²³Wakchakunaq chakran askha mikhunata ruruqtinqa, mana chanin ruwaqkunan chay rurusqata qechupun.

²⁴Wawanta mana wanachiqqa wawantan cheqnikun, wawanta munakuqmi ichaqa sumaqta wanachin.

²⁵Chanin runaqa askha mikhunayoqmi, millay runan ichaqa yarqachikushallan.