Read Quechua Cuzco Bible 1988 PROVERBIOS 15 Bible Online

PROVERBIOS 15 - Quechua Cuzco Bible 1988 bible

PROVERBIOS 15

¹Llamp'u simiwan kutichikuqqa phiñakuytan thasnun, k'arak simin ichaqa astawan phiñachin.

²Yachayniyoqkuna rimaspanqa yachaytan sumaqchan, mana yuyayniyoqkunan ichaqa yanqakunata rimarqarin.

³Señor Diosqa hinantin pachatan rikun, qhawashanmi allin runatapas mana allin runatapas.

⁴Llamp'uyachiq simiqa kawsarichinmi, q'ewisqa rimaymi ichaqa sonqota k'irin.

⁵Mana yuyayniyoqqa taytanpa kunaykusqantan pisichan, anyaykusqata hap'ikuqmi ichaqa allin yuyayniyoq.

⁶Chanin runaqa wasinpi askha kaqniyoqmi, millay runapaqmi ichaqa tarisqankunaqa uma nanay.

⁷Yachayniyoqkunaq siminqa yachaytan mast'arin, mana yuyayniyoqkunaqa manan chhaynatachu mast'arin.

⁸Señor Diosqa millay runakunaq sacrificio haywasqantan millakun, chanin runa mañakuqtinmi ichaqa kusikun.

⁹Señor Diosqa millay runakunaq imaynachus kawsasqantan millakun, pichus chanin kawsaqtan ichaqa munakun.

¹⁰Allin ñanta saqeqtaqa k'arak simiwanmi anyana, anyaykusqata mana uyarikuqqa wañunqan.

¹¹Wañuy-pachatapas Ukhu-pachatapas Señor Diosqa sut'itan qhawashan, ¡chaychu runakunaq sonqontaqa mana rikunman!

¹²Uma hoqariqqa manan phiñariqninta munakunchu, manallataqmi yachayniyoqkunatapas tapurikunchu.

¹³Kusisqa sonqoqa uyatan sumaqchan, llakisqa sonqotaq uyata umphuyachin.

¹⁴Reparaq sonqoqa yachaytan munan, mana yuyayniyoqkunan ichaqa yanqa simikunawan saksaykun.

¹⁵Llakiq ñit'isqanpaqqa sapa p'unchaypas sasakaman, kusisqa sonqoyoqpaqmi ichaqa sapa p'unchaypas kusikuyllapuni.

¹⁶Aswan allinqa wakcha kaspa Señor Diosta manchakuymi qhapaq kaspa llakipakuymantaqa.

¹⁷Aswan allinqa munakuypa kasqanpi yuyu mikhuymi cheqnikuypa kasqanpi wira waka aycha mikhuymantaqa.

¹⁸T'impuq sonqo runaqa ch'aqwatan sayarichin, mana usqhay phiñakuqmi ichaqa ch'aqwata thanichin.

¹⁹Qellaq ñanninqa khiskawan qenchasqa hinan, chanin runaq purinanmi ichaqa sumaq ñan hina.

²⁰Yachayniyoq churiqa taytantan kusichin, mana yuyayniyoq runan ichaqa mamanta pisichan.

²¹Mana yuyayniyoqqa mana umayoq-kayninwanmi kusikun, yuyayniyoqmi ichaqa chaninllatapuni kawsayta munan.

²²Yuyaychaq mana kaqtinqa, imachus yuyaykusqakunan qollupun, askha yuyaychaqkuna kaqtinmi ichaqa yuyaykusqakunaqa hunt'akun.

²³Runaqa kusikunmi allin tupasqata kutichisqanwan, tiemponpi rimasqapas imay allinmi!

²⁴Yachayniyoqqa kawsayman pusaq ñannintan purin, manan wañuyman pusaq ñannintachu purin.

²⁵Señor Diosqa uma hoqariqpa wasintan raqayman tukuchin, viudaq hallp'antan ichaqa mana qechuchinchu.

²⁶Señor Diosqa millakunmi millay runakunaq yuyaykusqankunata, sumaq sonqowan rimasqakunan ichaqa ch'uyakama.

²⁷Suwakuyman k'askakuqqa wasintan sasaman q'epiykun, lluk'iykuyta cheqnikuqmi ichaqa kawsanqa.

²⁸Chanin runaqa allintaraqmi yuyaykun kutichinanpaq, millay runan ichaqa millaykunata rimarqarillanña.

²⁹Señor Diosqa millay runakunamantan karunchakun, chanin runakunaq mañakusqantan ichaqa uyarin.

³⁰Sumaq qhawariyqa sonqotan kusirichin, allin willakuyqa wakmantan kallpachallantaq.

³¹Sonqo kawsarichiq anyaykusqata uyariqqa yachayniyoqkunaq qayllanpin kusisqa kashanqa.

³²Wanaykachiyta pisichaqqa pay kikintan pisichakun, anyaykusqata uyarikuqqa allin yuyaytan tarin.

³³Señor Diosta manchakuqqa yachayniyoq-kaytan yachaqan, k'umuykukuq runaqa yupaychasqan kanqa.