Read Quechua Cuzco Bible 1988 PROVERBIOS 17 Bible Online

PROVERBIOS 17 - Quechua Cuzco Bible 1988 bible

PROVERBIOS 17

¹Ch'aqwaypa q'esachakusqan wasipi askha mikhunamantaqa aswan allinmi sumaq kawsaypa kasqan wasipi huk khamuykuy ch'aki t'anta.

²Allin yuyayniyoq kamachiqa mana p'enqakuq churitan kamachinqa, wawqenkunawantaqmi herenciata chaskinqa.

³Crisolmi qolqeta ch'uyayachina, horno ninan qorita ch'uyayachina, Señor Diostaqmi sonqokunata pruebaqqa.

⁴Millay runaqa mana chanin rimasqatan uyarin, llullaqa millay simitan uyarin.

⁵Wakcha runata asipayaqqa Kamaqentan asipayan, muchuqmanta kusikuqqa muchuchisqapunin kanqa.

⁶Yuyaq runakunaq coronanqa nietokunan, wawakunaq kusikunanqa tayta-mamakunan.

⁷Mana yuyayniyoqpaqqa manan allinchu sumaq aysarisqata rimayqa, kamachikuqpaqpas manallataqmi allinchu llullata rimayqa.

⁸Lluk'iykuyta yachaqpaqqa enqa rumi hinan lluk'iykuyqa, maymanña rin chaypas payqa allillanpunin.

⁹Huchallikusqata pampachaqqa astawanmi munanachin, huchallikusqata willaykachakuqmi ichaqa amigokunata t'aqanachin.

¹⁰Allin reparaq runaqa huk anyaykusqallawanmi astawan yachaqan pachak maki hasut'iwan mana yuyayniyoqpa yachaqasqanmantaqa.

¹¹Millay runaqa contra hatariyllatapunin munan, ichaqa sinchi muchuchiq kachapuritan payman kachanqaku.

¹²Aswan allinqa uñankuna qechusqa china ukumariwan tupaymi mana yuyayniyoq-kayta ruwashaq runawan tupaymantaqa.

¹³Runachus allinmanta mana allinwan kutichin chayqa, wasinpiqa sasachakuy kashallanqapunin.

¹⁴Ch'aqwata hatarichiqqa qochayachisqa unuta kacharpariq hinan, chayrayku ch'aqwa manaraq qallarishaqtin churanakuyta saqepuy.

¹⁵Huchallikuqta: Mana huchayoqmi, niytapas, chanin runata: Huchayoqmi, niytapas Señor Diosqa millakunmi.

¹⁶Mana yuyayniyoqqa manan yachayta munanchu, chayri, ¿imapaqtaq qolqeta apamun?

¹⁷Tukuy tiempon amigoqa munakun, wawqeqa nacen llaki-phutiypi yanapananpaqmi.

¹⁸Mana yuyayniyoq runaqa fiakunanpaqmi prometekun, hinaspan wasimasinpaq fiakun.

¹⁹Ch'aqwayta munaqqa huchallikuytan munan, alabakuqqa waqlliynintan maskhan.

²⁰Millay sonqoyoqqa manan hayk'aqpas allinkaqta tarinchu, llullakuqpas mana allinmanmi urmaykun.

²¹Mana yuyayniyoq churiqa taytantan llakichin, mana yuyayniyoq runaq taytanqa manan kusikunchu.

²²Kusi sonqoqa allin hampin, llakisqa sonqon ichaqa onqochin.

²³Millay runaqa pakapi lluk'iykusqatan chaskikun chaninchayta waqllichinanpaq.

²⁴Yuyayniyoqqa yachayllawanpunin ruwayta munan, mana yuyayniyoqmi ichaqa imaymanaman sat'ikun.

²⁵Mana yuyayniyoq churiqa taytantan llakichin, mamantapas waqapachin.

²⁶Manan allinchu chanin runata muchuchiyqa, manallataq allinchu allichachaq runakunata hasut'iypas chanin kawsayniyoq kasqankumantaqa.

²⁷Takyasqa runaqa tupusqallatan riman, allin reparaqqa samp'a sonqollan.

²⁸Mana yuyayniyoqpas upallakuqtinqa, yachayniyoqpaq hap'isqan kanqa, upallakuqqa yuyayniyoqpaq hap'isqan kanqa.