Read Quechua Cuzco Bible 1988 PROVERBIOS 2 Bible Online

PROVERBIOS 2 - Quechua Cuzco Bible 1988 bible

PROVERBIOS 2

¹Churilláy, simiykunata hap'ikuy, kamachikusqaykunatapas sonqoykipi hap'iy.

²Yachayta makilla uyariy, allin yuyayman sonqollikuy,

³allin reparayta chaskinaykipaq mañakuy, allin yuyayta tarinaykipaqpas waqyakuy,

⁴qolqeta hina maskhay, chaniyoq pakasqa illakunata hina t'aqwiy.

⁵Chaymi Señor Dios manchakuyta yachanki, paytapas reqsinki.

⁶Señor Diosmi yachayta qoqqa, paymi reqsiytapas yachachin, allin yuyayniyoq-kaytapas yachachin.

⁷Señor Diosmi chanin runakunata yanapan atipanankupaq, chanin kawsaqkunatan amachaykun.

⁸Runamasinkupaq chaninkaqta ruwaqkunatan waqaychan, payman sonqollikuqkunatapas hark'aykunmi.

⁹Chaypachan entiendenki imaynatachus allinta kawsanaykipaq, entiendellankitaq imachus chanin-kayta, chaninchayta, k'apak-kaytapas.

¹⁰Chaymi yachayniyoq kanki, reqsiywanpas misk'illikunki,

¹¹chaypachan allin reparayqa waqaychasunki, allin yuyaypas mana p'itispa qhawasunki.

¹²Yachaymi millay ñanmanta karunchasunki, waqllisqakunata yuyaykuq runakunamanta qespichisunki.

¹³Yachaymi allin ñanta saqepuqkunamanta karunchasunki, tutayaq ñankunanta puriqkunamanta qespichisunki,

¹⁴millaykaqta ruwaspa kusikuqkunamantapas karunchasunki, waqllispa viciopi kusikuqkunamanta qespichisunki.

¹⁵Chay runakunaqa waqlliypin kawsanku, kawsayninkuqa q'ewisqallapunin.

¹⁶Yachayqa wasanchaq warmimantapas karunchasunkin, wayllupayaspa rimaq wak warmimanta.

¹⁷Paymi sipas kasqan qosanta wikch'upun, Diosninpa qayllanpi rimanakusqantapas qonqapun.

¹⁸Wasinman riyqa wañuyman riy hinan, payman qayllaykuyqa wañusqakunaman qayllaykuy hinan.

¹⁹Pipas wasinman haykuqqa manan kutimunqachu manañan hayk'aqpas kawsay ñanninta purinqachu.

²⁰Chay hinaqa allinkunaq ñanninta puriy, chaninkunaq kawsasqanta hinapuni kawsay.

²¹Chanin kawsaqkunaqa kay suyupin tiyanqaku, mana huchallikuqkunapas kaypin kashanqaku,

²²millay runakunan ichaqa kay suyumanta wikch'usqa kanqaku, wasanchaqkunapas chaymanta t'irasqan kanqaku.