Read Quechua Cuzco Bible 1988 PROVERBIOS 21 Bible Online

PROVERBIOS 21 - Quechua Cuzco Bible 1988 bible

PROVERBIOS 21

¹Yarqha unuta hinan Señor Diosqa reypa yuyayninta pusan, maymanchus munasqanmanmi q'ewin.

²Runapaqqa tukuy ima ruwasqanpas allinmanmi rikch'akun, Señor Diosmi ichaqa yuyaykusqakunata tupun.

³Chaninkaqtawan kuskachaytawan ruway, chaykunaqa Señor Diospa aswan sumaq qhawarisqanmi sacrificasqakunamantaqa.

⁴Hatunmanta qhawaykuqpas anchaykachaq sonqopas millay runakunatan pusan, chayqa huchan.

⁵K'uchi runaq yuyaykusqankunaqa allinmankaman tukun, usqhayllata qhapaqyayta munaqtaqmi wakchayapun.

⁶Llullakuspa qhapaq-kaykunata tariyqa toqllapi wañuqkunaq chinkapuq samaynin hinan.

⁷Millay runakunaq maqakuq-kayninkuqa paykunallatataqmi wañuchinqa, manapunin maychus chaninkaqta ruwayta munankuchu.

⁸Hucha q'epi runaq kawsasqanqa q'ewisqan, ch'uya runaq ruwasqankunan ichaqa cheqankama.

⁹Aswan allinqa wasi pata k'uchupi tiyakuymi ch'aqwaylla-ch'aqwaq warmiwan hatun wasipi tiyaymantaqa.

¹⁰Millay runaqa mana allinllatapunin munan, manapunin runamasintaqa khuyapayanchu.

¹¹Uma hoqariq muchuchisqa kaqtinqa, pisi yuyayniyoqmi yachaqan, yachayniyoqta yachachiqtinmi, yachayta yachaqan.

¹²Chanin Diosqa millay runaq wasin imaynachus kasqantan yachan, paykunataqa waqlliymanmi qaraykun.

¹³Pipas wakchaq mañakusqanta mana uyariqqa paypas mañakuqtin manallataqmi uyarisqachu kanqa.

¹⁴Pakallapi sumaq sonqo qoykusqaqa phiñakuytan thasnun, lluk'iykuyta haywasqapas k'arak phiñakuytan tiyaykachin.

¹⁵Chanin t'aqtay kaqtinqa chanin runakunan kusikunku, mana allinkaqta ruwaqkunan ichaqa anchata mancharikunku.

¹⁶Allin yuyay ñanmanta t'aqakuqqa wañusqakunaq huñunakusqan ukhupin rikhurinqa.

¹⁷Aycha kusichiyman sonqollikuqqa wakcha runan kanqa, sumaq mikhuyllata mikhuqqa manapunin qhapaqyanqachu.

¹⁸Chanin runaq muchunantaqa millay runan muchunqa, allin runakunaq rantinpiqa huchallikuq runan muchunqa.

¹⁹Ch'usaq cheqaspi tiyakuymi aswan allinqa ch'aqwaylla-ch'aqwaq phiñakuylla-phiñakuq warmiwan tiyaymantaqa.

²⁰Chaniyoq illakunan q'apaq hawinakunan yachayniyoqpa wasinpiqa kashan, mana yuyayniyoq runan ichaqa tukuy kaqninta q'aruykapun.

²¹Chanin-kayta munakuyta maskhaqqa unaytan kawsanqa, hukkunapas chanintan sumaqtan rikunqaku.

²²Yachayniyoq runan allin hark'asqa llaqtaman phawaykun, chay llaqtaq confiakusqan pukaratataq thunin.

²³Simintapas qalluntapas watakuqqa manan ima llaki-phutiypipas rikukunchu.

²⁴Hatunchakuqtaqa anchaykachaqtaqa “uma hoqariq” ninkun, sinchi uma hoqariq kaspanmi chay hinata kawsan.

²⁵Qellataqa munapakuyninmi wañuchin, makinwan mana llank'ayta munasqanrayku.

²⁶P'unchay ch'isiyaqmi munapakun, chanin runan ichaqa mana mich'akuspa qon.

²⁷Millay runakunaq sacrificio haywasqanqa millakuymi, millayta yuyaykuspa chayta haywaqtinkuqa aswan millakuymi.

²⁸Llulla testigoqa wañunqan, pipas uyariyta yachaqmi ichaqa rimayta atillanpuni.

²⁹Millay runaqa mana reparachikuq hinallan purin, chanin runan ichaqa imaynatachus kawsasqanta allinta yuyan.

³⁰Manan yachaypas, yuyaypas, yuyaykukuypas Señor Diostaqa atipanmanchu.

³¹Runaqa awqa-tinkunapaqmi caballota wakichikun, ichaqa Señor Diosllan atipachiqqa.