Read Quechua Cuzco Bible 1988 PROVERBIOS 24 Bible Online

PROVERBIOS 24 - Quechua Cuzco Bible 1988 bible

PROVERBIOS 24

¹Ama millay runakunata envidiakuychu, ama paykunawan huñukuytapas munaychu,

²paykunaqa maqakuyllatan yuyaykunku, mana chanin ruwayllatan rimankupas.

³Yachay kaqtinmi wasiqa perqakun, allin yuyay kaqtinmi qaqata sayan,

⁴Reqsiq-kay kaqtinmi wasikunapas hunt'an imaymana chaniyoq kaqkunawan munayllaña illakunawan ima.

⁵Yachayniyoqqa atiyniyoqmi, reqsiq runapas astawanmi kallpachakun.

⁶Allintaraq yuyaykuspan awqa-tinkuymanqa rina, atipanapaqqa askha yuyaychaqkunawanmi yuyaychachikuna.

⁷Yachayqa sinchi sasan mana yuyayniyoqkunapaqqa, payqa manan juzganapiqa rimariyta atinchu.

⁸Mana chanin ruwayllatapuni yuyaykuq runaqa “millay yuyaykuq runa” nisqan.

⁹Mana yuyayniyoqpa yuyaykusqanqa huchan, hatunchakuqtaqa runaqa cheqnikunpunin.

¹⁰Llaki-phutiy p'unchaypichus pisi kallpayanki chayqa, pisi kallpapunin kashanki.

¹¹Wañuchinapaq huchachasqa mana huchayoqkunata qespichiy, wañuchinapaqña nisqakunata kacharichiy.

¹²Manapunin yacharqaykuchu, nispachus ninki, chayqa, ¿manachu sonqokunata taripaqqa chayta reparan? ¿Manachu waqaychaqniykiqa chayta yachan? Paymi sapanka runaman ruwasqanman hina qon.

¹³Churilláy, miel misk'ita mikhuy, chayqa sumaqmi, simiykipaqqa misk'in chay mielqa.

¹⁴Yachallaytaq yachayqa qanpaqqa misk'i kasqanta, chaytachus tarinki chayqa qhepa p'unchayqa qanpaq kashanraqmi, suyakuyniykiqa manan qollupunqachu.

¹⁵Ama chanin runaq wasintaqa suwa hinaqa qhamiyaychu ama wasintapas suwaychu.

¹⁶Qanchis kutitaña chanin runa urmanqa chaypas, payqa sayaripullanqapunin, millay runakunatan ichaqa hatun llaki hap'inqa.

¹⁷Awqayki urmaykuqtinqa aman kusikunkichu, misk'akuqtinpas aman sonqoykipi kusikunkichu.

¹⁸Señor Diosqa manan kusisqachu chaytaqa rikunqa, hinaspa awqaykipaq mana phiñakunmanchu.

¹⁹Ama llakipakuychu mana chaninkuna hawaqa, amallataq envidiakuypaschu millay runakunataqa.

²⁰Millay runapaqqa manan qhepa p'unchayraq kanchu, millay runaqa lámpara hinan wañupunqa.

²¹Churilláy, Diostawan reytawan manchakuy, ama huk-hinata kawsanapaq cambiayta munaqkunawanqa huñukuychu,

²²Diospas reypas qonqayllan paykunata muchuchinqa. ¿Pin yachan imayna muchuytachus chayachimunankuta?

²³Kaykunapas yachayniyoqkunaq rimasqankunan: Juzganapi runaman sayapakuyqa manan allinchu.

²⁴Huchallikuqta: Mana huchayoqmi kanki, niq jueztaqa llaqtakunan ñakanku, suyukunan cheqnikunku.

²⁵Huchallikuqkunata huchachaqkunan ichaqa allillanpuni kanqaku, sumaq saminchasqan kanqaku.

²⁶Chanin simiwan kutichikuqqa, siminmanta much'aykuq hinan.

²⁷Hawapi ruwanaykikunataraq ruwamuy, chakra llank'anaykikunataraq llank'amuy, chaymantañan wasiykita sayarichinki.

²⁸Ama yanqapuniqa runamasiyki contra testigo kaychu, amataq simiykiwanpas q'otuychu.

²⁹Ama niychu: Imaynatachus ruwawarqan chay hinatan paytaqa ruwasaq, chay runamanqa ruwawasqanman hinan kutichisaq, nispaykiqa.

³⁰Qella runaq chakran qayllatan pasarqani mana yuyayniyoq runaq uvas chakran qayllata:

³¹chakrantinpin khiska wiñaykapusqa, kisan chakrata tukurqapusqa, rumi perqanpas thunisqañan kapushasqa.

³²Chayta rikuspaymi sonqoypi yuyaykurqani, chayta rikuspaymi kayta yachaqarqani:

³³Huk chhikallanta puñurinki, huk chhikallanta ch'illmirinki, puñunaykipaq huk chhikallanta makiykita oqllarinki.

³⁴Pisichikuyniykiqa llat'anaq runa hinan hap'irqosunki, wakchayayniykipas maqanantin runa hinan ayparqosunki.