Read Quechua Cuzco Bible 1988 PROVERBIOS 25 Bible Online

PROVERBIOS 25 - Quechua Cuzco Bible 1988 bible

PROVERBIOS 25

¹Kaykunapas Salomonpa rikch'anachiy siminkunaraqmi, Judá suyupi rey Ezekiaspa runankunaq qelqasqata hich'asqankuna.

²Diospa imatapas pakasqanmantaqa paytan yupaychana, reykunaq imatapas t'aqwisqanmantaqa paykunatan hatunchana.

³Hanaq pachaq suni-kaynintawanqa, hallp'a pachaq ukhu-kaynintawanqa, reykunaq sonqontawanqa manan t'aqwinapaq atikunchu.

⁴Qolqemanta khankankunata t'aqay, hinan unuyachiqqa qolqe qeruta ruwanqa.

⁵Millay runata reypa qayllanmanta t'aqay, chaymi kamachikuyninqa chaninpi allinta takyanqa.

⁶Reypa qayllanpiqa ama hatunchakuychu, hatunkunaq kasqanpipas amallataq kaychu.

⁷Aswan allinmi: Kayman hamuy, nispa ninasuyki, uma runaq qayllanpi k'umuykuchisqa kanaykimantaqa.

⁸Ñawiykiq rikusqantaqa ama juzganaman usqhaylla phawachiychu, paqtan hukkaq testigo llullapaq hap'ichisunkiman, hinan qhepaman mana ima ruwaytapas atiwaqchu.

⁹Runamasiykiq ch'atasqasuykimantaqa qanlla tupapakuy, hukpa willaykukusqantan ichaqa ama rimarinkichu.

¹⁰Paqtan uyariqniyki p'enqachisunkiman, hinaspa p'enqachisqa kasqayki mana chinkapunmanñachu.

¹¹Qolqepi ch'olqochisqa qori manzana hinan tiemponpipuni rimasqa simiqa.

¹²Qori anillo hinan, ch'uya qori walqana hinan kasukuq runata yachayniyoqpa anyaykusqanqa.

¹³Imaynan cosecha q'oñi p'unchaykunapi khutu unuqa allin, ahinan kachaqninpaq hunt'aq kachapuriqa, patronnintan kallpachaykun.

¹⁴Imaynan mana parayoq phuyupas wayrapas, chay hinan qoykukuq kasqanmanta yanqalla rimaq runaqa.

¹⁵Pacienciaywanmi kamachikuqtaqa uyachina, llamp'u simitaqmi mana kuyuriq sonqota kuyurichin.

¹⁶Miel misk'itachus tarinki chayqa, tupusqallata mikhuy, paqtan chaywan saksaykuspayki aqtumuwaq.

¹⁷Ama wasimasiykiq wasinta sinchita puripayaychu, paqtan qanwan amikuspa cheqnikusunkiman.

¹⁸Maqana, espada, ñawch'isapa wach'ina hinan runamasinta yanqa tumpaq runaqa.

¹⁹Hut'usqa kiru hinan, wist'u chaki hinan llaki-phutiy p'unchaypi mana simin hunt'aq runaman hap'ipakuyqa.

²⁰Llakisqa sonqoyoqpaq takipuqqa chiri p'unchaypi p'achata llat'aq hinan, otaq lleqthi k'iriman kachi unuta hich'aykuq hina.

²¹Awqaykichus yarqachikunqa chayqa, mikhuchiy, ch'akichikunqataqchus chayqa, ukyachiy,

²²chay hinapin sonqonta “ch'allaq” nichinki, Señor Diostaq chaymanta kutichipusunki.

²³Imaynan paraqa wayrawan chayamun, chay hinan qhepapi runamanta rimasqakunaqa runata phiñachin.

²⁴Aswan allinmi wasi pata k'uchullapi tiyaykuy ch'aqwaylla-ch'aqwaq warmiwan hatun wasipi tiyaymantaqa.

²⁵Imaynan chiri unupas ch'akichikuqpaq, chay hinan karu suyumanta chayamuq sumaq willakuykunaqa.

²⁶Imaynan qonchu pukyupas qhellichasqa p'uytupas, chay hinan millay runawan mana churanakuq chanin runaqa.

²⁷Manan allinchu askha miel misk'ita mikhuyqa, manallataqmi allinchu astawan hatunchasqa-kayta munayqa.

²⁸Thunisqataq mana perqayoqtaq llaqta hinan pay kikinta mana mat'iykukuy yachaq runaqa.