Read Quechua Cuzco Bible 1988 PROVERBIOS 26 Bible Online

PROVERBIOS 26 - Quechua Cuzco Bible 1988 bible

PROVERBIOS 26

¹Imaynan ruphay mitapi rit'iqa mana allinchu, cosecha ukhupi parapas mana allinchu, chay hinan mana yuyayniyoqpaqqa yupaychayqa mana allinchu.

²Imaynan pichitankaqa muyuspa phalashallan khallwapas muyushallan, chay hinan yanqa-qasi ñakaypas mana pimanpas chayanchu.

³Caballopaqmi soq'anaqa, asnopaqmi waskhaqa, mana yuyayniyoqtataq p'ananapas.

⁴Ama hayk'aqpas mana yuyayniyoqmanqa kutichiychu mana umayoq kayninman hinaqa, ama qanpas pay hina kanaykipaq.

⁵Mana yuyayniyoqmanqa mana umayoq kasqanman hina kutichiy, ama yuyaykusqanpi yachayniyoqpaq qhawakunanpaq.

⁶Mana yuyayniyoqman willachiyqa chakita q'allakuy hinan, sasapipas rikukuy hinan.

⁷Wist'uq chakinqa yanqan warkurayan, chay hinan mana yuyayniyoqpa siminpi rikch'anachiy simiqa.

⁸Mana yuyayniyoqta yupaychayqa warak'api rumita watay hinan.

⁹Imaynan machasqaq makinpi khiska sat'irayan, chay hinan mana yuyayniyoqpa siminpi rikch'anachiy simiqa.

¹⁰Imaynan wach'inawan wach'iqqa pitapas k'irin, ahinan mana yuyayniyoqtapas mayqen purikuqtapas llank'achiqqa.

¹¹Imaynan alqoqa aqtumusqanta kutirpakapun, ahinan mana yuyayniyoq ruwayta huktawan ruwaqqa.

¹²¿Rikurqankichu yuyaykusqanpi yachaysapa runata? Mana yuyayniyoqmantan aswan suyakuyqa kan, manataq chay yachaysapamantaqa.

¹³Mana llank'ananraykun qellaqa nin: ¡Leonmi ñanpi kashan! ¡Leonmi callepi kashan! nispa.

¹⁴Imaynan punkuqa muyunankunapi muyun, chay hinan qellaqa puñunanmanta mana lloqsinchu.

¹⁵Qellaqa platomanmi llaphch'aykun, makinmi utin siminman apananpaq.

¹⁶Qellaqa ninmi: Allin kutichiyta yachaq qanchis runamantapas aswan yachayniyoqmi kani, nispa.

¹⁷Hukpa ch'aqwasqanman chapukuqqa alqota ninrinkunamanta hap'irqoq hinan.

¹⁸Imaynan waq'ayasqaqa wañuchinapaq rawrashaq flechakunata wach'in,

¹⁹chay hinan qharimasinta: Yanqallan chaytaqa nirqayki, nispa q'otuq runaqa.

²⁰Mana llant'awanqa ninaqa wañunmi, maypichus simi apaqpa mana kasqanpin ch'aqwaypas ch'inyapun.

²¹K'illimisaqa sansapaqmi, llant'apas ninapaqmi, ch'aqwaylla-ch'aqwaq runataqmi ch'aqwata sayarichinanpaq.

²²Simi apaqpa siminkunaqa misk'i mikhuna hinan, sonqo ukhukamataqmi chayanpas.

²³K'arpa manka pataman lozawan llusisqa hinan ñapas-ñapas rimasqa millay sonqowan rimaqqa.

²⁴Cheqnipakuqqa manan cheqnipakuq hinachu riman, sonqon ukhupin ichaqa millaykunata yuyaykun.

²⁵Sumaqtachus rimapayasunki chayqa, aman payta creenkichu, sonqonqa millaywan hunt'allañan kashan.

²⁶Cheqnikuynintaña llullakuspa pakaykunqa chaypas, millay kayninqa llapa runa qayllapin rikhurichisqa kanqa.

²⁷T'oqota hasp'iqqa chaymanmi urmaykunqa, pipas rumita tanqanqa chayqa, payllamantaqmi urmaykunqa.

²⁸Llullaqa k'irisqan runakunatan cheqnikun, llunk'upayaq simiqa waqllichinmi.