Read Quechua Cuzco Bible 1988 PROVERBIOS 27 Bible Online

PROVERBIOS 27 - Quechua Cuzco Bible 1988 bible

PROVERBIOS 27

¹Ama: Paqarin p'unchaytaraqqa ruwasaq, niychu, manan yachankichu imachus chay p'unchaypi kananta.

²Hukkunan hatunchasunki ama qan kikillaykiqa, wak runakunan yupaychasunki amataq qan kikillaykiqa.

³Llasan rumiqa, llasallataqmi aqopas, mana yuyayniyoq runaq phiñachisqanmi ichaqa aswan llasaraq.

⁴Millaymi phiñakuyqa, phoqchiq unu hinan k'arak phiñakuyqa, envidiakuymi ichaqa mana sayachiy atiy.

⁵Aswan allinmi sut'ita phiñariyqa munakuspa mana ima nispapas niymantaqa.

⁶Amigoqa munakuspan nanaykuchinman, awqayki oqllapayasuqtiykin ichaqa cuidakunki.

⁷Saksasqa runaqa manan miel misk'itaqa munanchu, yarqasqapaqmi ichaqa llapa hayapas misk'i.

⁸Imaynan phalaq animalpas oqllashasqanta saqepun, chay hinan wasinmanta ripuq runaqa.

⁹Q'apaq hawinapas inciensopas sonqotan kusichin, amigoq allin yuyaychasqanqa runatan kallpachan.

¹⁰Amapuni amigoykitaqa saqeychu, amallataq taytaykiq amigontapas. Llaki-phutiypi kasqayki p'unchaypiqa ama wawqeykiq wasinta riychu, aswan allinmi sispa wasimasiman riyqa karu wawqeqta riymantaqa.

¹¹Churilláy, yachayniyoq kay, hinaspa sonqoyta kusirichiy, chaymi k'amiwaqniyman kutichisaq.

¹²Yuyayniyoqqa mana allin kaqtan reparan hinaspan pakakun, pisi yuyayniyoqkunan ichaqa pasallanku hinaspan k'irisqa rikukapunku.

¹³Wak llaqtayoq manukuqpaq fiakuqpa p'achanta chaskiy, wasanchaq warmipaq fiakuqmanta p'acha prendata waqaychay.

¹⁴Tutallamanta runamasinta kunkayoqta napaykuqqa ñakanmanpas hinapaq hap'isqan kanqa.

¹⁵Paray tiempopi mana thanispa sut'uq hinan ch'aqwaylla-ch'aqwaq warmiqa,

¹⁶payta upallachiyqa wayratapas sayachiyta munay hinan, aceitetapas q'apiy hinan.

¹⁷Fierrotaqa fierrowanmi filochanku, chay hinatan runataqa runamasin allinyachin.

¹⁸Higos sach'ata cuidaqqa rurusqantan mikhunqa, patronninta cuidaqpas yupaychasqan kanqa.

¹⁹Imaynan uyaqa unupi rikhurin, chay hinan runaq sonqonpas paypa imaynachus kasqanta rikhurichin.

²⁰Wañuy-pachawan Ukhu-pachawanqa manan hayk'aqpas saksanchu, chay hinan runaq ñawinpas munapakushallanpuni.

²¹Crisolmi qolqeta ch'uyayachina, horno ninataq qorita ch'uyayachina, runataq hukkunaq hatunchasqanwan reqsikun.

²²Trigo ch'aqesqa ukhupi huk tunawawanña mana yuyayniyoqta maranpi kutawaq chaypas, manapunin mana umayoq-kayninqa paymanta lloqsinqachu.

²³Allintapuni yachay ovejaykikunaq imaynachus kashasqantaqa, makilla qhaway oveja t'aqaykikunata.

²⁴Qhapaq-kaykunapas manan wiñaypaqchu sayan, coronapas manan wiñaypaqchu kashan.

²⁵Ichhusqa q'achu ch'ikchimuqtinqa, orqokunapi kaq q'achupas q'achusqa kaqtinqa,

²⁶borregoykikunan p'achaykipaq millmata qosunki, orqo cabraykikuna qolqechasqaqa chakra rantinaykipaqmi kanqa,

²⁷cabraykikunaqa askha lechetan qosunki qanpa ukyanaykipaq familiaykiqpas ukyananpaq warmi kamachiykikunaqpas ukyananpaqwan.