Read Quechua Cuzco Bible 1988 PROVERBIOS 28 Bible Online

PROVERBIOS 28 - Quechua Cuzco Bible 1988 bible

PROVERBIOS 28

¹Millay runaqa mana piqpa qatiykachasqanmi ayqen, chanin runan ichaqa león hina mana manchakunchu.

²Hatun suyuntinpi ch'aqwaylla kaqtinmi kamachikuqkunaqa askhayan, yuyayniyoq yachayniyoq kamachikuqtinmi ichaqa suyuqa allinta sayan.

³Wakcha runaqa wakcha-masinkunata sarunchaqqa chakrakunata apaq lloqlla para hinan.

⁴Kamachikuy simita saqepuqkunaqa millay runakunatan hatunchanku, kamachikuy simita waqaychaqkunan ichaqa millay runakunaman hark'apakunku.

⁵Millay runakunaqa manan chaninchayta entiendenkuchu, Señor Diosta yupaychaqkunan ichaqa chaninchayta llapanta entiendenku.

⁶Chaninta puriq wakcha runan aswan allinqa waqllisqa kawsaq qhapaqmantaqa.

⁷Diospa kamachikusqan simita hunt'aqqa allin reparaq churin, rakrapukunaq mikhuqmasinmi ichaqa taytanta p'enqachin.

⁸Qolqeq uñanta chaskispa qhapaq-kaykunata huñuqqa, wakchakunata llakipayaqpaqmi huñun.

⁹Pipas kamachikuy simita mana uyariyta munanchu chayqa Diospas mañakusqantaqa millakullantaqmi.

¹⁰Chanin runakunata mana allin ñanman pantaykuchiqqa, pay kikinpa t'oqollanmantaqmi urmaykunqa, mana huchachana runakunan ichaqa allinkaqta chaskinqaku.

¹¹Qhapaq runaqa kikinpa yuyaykusqanpin yachaysapa, allin reparaq wakcha runan ichaqa mana hinapunichu kasqanta sut'inchan.

¹²Chanin runakuna atipaqtinkuqa, anchatan kusikunku, millay runakuna kamachikuqtinkun ichaqa llapalla pakakunku.

¹³Huchankunata pakaykuqqa manan allinyanqachu, huchankunata willakuspa saqepuqmi ichaqa khuyapayasqa kanqa.

¹⁴Kusisamiyoqmi Señor Diosta manchakushallanpuni chay runaqa, sonqonta rumiyachiqmi ichaqa mana allinman urmaykunqa.

¹⁵Qapariq león hinan phawamuq ukumari hinan wakcha llaqtata kamachiq millay runaqa.

¹⁶Mana tanteaspa kamachikuqqa anchatan runata sarunchan, mana chaninta ruwaspa qhapaqyaqta cheqnikuqmi ichaqa unayta kawsanqa.

¹⁷Runa wañuchiq hucha q'epiqa aya p'ampanaman haykunankaman ayqenqa, ama pipas paytaqa hark'achunchu.

¹⁸Chaninpi puriqqa qespichisqan kanqa, waqllisqa kawsaypi puriqmi ichaqa qonqaylla urmaykapunqa.

¹⁹Chakranta llank'aqqa askha mikhunayoqmi, hanraykachaspa puriqmi ichaqa wakchayaykapun.

²⁰Hunt'aq runaqa askha saminchayoqmi kanqa, usqhayllaman qhapaqyaqmi ichaqa huchachasqapuni kanqa.

²¹Runaman sayapakuyqa manan allinchu, huk khamuykuy t'antaraykupas runaqa huchallikunmanmi.

²²Mich'a runaqa usqhayllatan qhapaqyan, manataqmi yachanchu wakchayanan chayamunanta.

²³Runata anyaykuqmi llunk'upayaqmantaqa aswan allin qhawarisqa qhepaman kanqa.

²⁴Tayta-mamanmanta suwaspa “manan chayqa huchachu” niqqa q'aru runaq suwamasinmi.

²⁵Imaymanayoq kayta munaqqa ch'aqwaykunatan sayarichin, Señor Diosman hap'ipakuqmi ichaqa allinyanqa.

²⁶Yuyaykusqallanman hap'ipakuqqa mana yuyayniyoqmi, yachaywan ruwaqmi ichaqa allillanpuni kanqa.

²⁷Wakcha runaman qoykuqqa manan wakchayanqachu, mana qoykuqmi ichaqa sinchi ñakasqa kanqa.

²⁸Millay runakuna kamachikuqtinqa llapallan pakakunku, chinkapuqtinkun ichaqa chanin runakunaqa askhayanku.