Read Quechua Cuzco Bible 1988 PROVERBIOS 3 Bible Online

PROVERBIOS 3 - Quechua Cuzco Bible 1988 bible

PROVERBIOS 3

¹Churilláy, ama yachachikuy simiykunata qonqapuychu, kamachikusqaykunata sonqoykipi waqaychay,

²chaymi unayta kawsanki, anchatapunin t'ikarinki.

³Munakuynillayoqpuni kashay, hunt'aqllapuni kashay, chay hina kawsaytaqa rikuchishallaypuni, chaykunataqa yuyashallaypuni.

⁴Hinan allin qhawarisqapas “allinmi” nisqapas kanki. Diospa ñawpaqenpipas runakunaq qayllanpipas.

⁵Tukuy sonqoykiwan Señor Diosman hap'ipakuy, amataq qan kikiykiq yuyayniykimanqa k'askakuychu.

⁶Tukuy ruwasqaykikunapi Señor Diosta yuyariy, paymi cheqan ñanninta pusasunki.

⁷Ama yuyaykuychu yachaysapa kasqaykita, Señor Diosta manchakuspa mana allinmanta t'aqakuy.

⁸Cuerpoykipaqmi hampi kanqa, tulluykikunapaqmi qhali-kay kanqa.

⁹Señor Diosta qhapaq-kayniykikunawan yupaychay, hinallataq chakraq rurusqan ñawpaq hoqarisqaykikunawanpas,

¹⁰chaymi taqeykikunaqa mikhuywan hunt'a kanqa, vino waqaychanaykikunapas phoqchinqaraq.

¹¹Churilláy, Señor Diospa wanachiynintaqa ama pisichaychu, amallataq anyaykuyninwanpas pisipaychu.

¹²Payqa pitachus munakusqantan wanachin, imaynan huk taytapas munakusqan churinta wanachin hinata.

¹³Kusisamiyoqmi yachayta tariq runaqa, allin yuyaytapas tariq runaqa.

¹⁴Yachayqa qolqeq uñanmantapas aswanraqmi, qorimantapas aswantaraqmi qhapaqyachin.

¹⁵Aswan chaniyoqmi umiñakunamantapas, manan ima munasqaykipas chaymanqa aypanmanchu.

¹⁶Paña makinwanmi unay kawsayta haywarimusunki, lloq'e makinwantaq qhapaq-kaytapas samitapas aypurimusunki.

¹⁷Yachayqa sumaq ñanninkunatan pusasunki, payqa sumaqtan kawsachisunki.

¹⁸Yachayqa kawsay sach'a hinan chayta chaskikuqkunapaq, kusisamiyoqmi yachayman k'askakuqkunaqa.

¹⁹Señor Diosqa yachayninwanmi kay pachata teqsicharqan, yuyayninwanmi hanaq pachata allinta sayachirqan.

²⁰Yachayninwanmi mama qochata rakirqan, phuyumantapas iphuchimurqan.

²¹Churilláy, allin reparayta allin yuyaykukuyta waqaychay, ama chaykunataqa qonqapuychu,

²²allintan kawsachisunki, kunka walqana hinataqmi sumaqchasunki.

²³Chaypachan mana manchaspa purinki, manataqmi misk'akunkipaschu.

²⁴Puñuspaykipas manan manchakunkichu, siriykuspaykipas misk'itan puñunki.

²⁵Aman qonqaylla mancharichiqta manchakunkichu, amallataq millay runakunaman muchuna chayamuqtinpas manchakunkichu,

²⁶Señor Diosqa qayllaykipi kashanqa chayrayku, paymi mayt'ukunaykimanta waqaychasunki.

²⁷Yanapayta atispaykiqa yanapana runata yanapaykuy.

²⁸Imachus qonaykipaq makiykipi kashaqtinqa, ama runamasiykita niychu: Ripuy, kutimunkiña, paqarinña qosqayki, nispaqa.

²⁹Wasimasiyki qayllaykipi tiyaspa qanpi hap'ipakuqpaqqa ama pay contra mana allinkunata yuyaykuychu,

³⁰Ama pitapas yanqapuniqa quejaychu, manataq pipas mana allinta ruwashasuqtiykiqa.

³¹Ama envidiakuychu runa maqaq runata, amataq imaynatachus kawsasqanta hinaqa kawsaychu.

³²Señor Diosqa waqllisqakunatan millakun, chanin runakunawantaq sonqonta tupachin.

³³Señor Diosqa millay runaq wasintan ñakan, chanin runaq familiantataq saminchan.

³⁴Señor Diosqa asipayanpunin asipayakuqkunataqa, k'umuykukuqkunatan ichaqa sumaqta qhawarin.

³⁵Señor Diosmi yachayniyoqkunata hatunchan, mana yuyayniyoqkunatataq p'enqachin.