Read Quechua Cuzco Bible 1988 PROVERBIOS 30 Bible Online

PROVERBIOS 30 - Quechua Cuzco Bible 1988 bible

PROVERBIOS 30

¹Masa llaqtapi tiyaq Jakepa churin Agurpa rimasqankuna. Agurmi Itielmanwan Ukalmanwan nirqan:

²Ñoqaqa runakuna ukhupi aswan mana yuyayniyoqpunin kani, manan runaq yuyaynin yuyayniyoqpaschu kani.

³Ñoqaqa manan yachaytaqa yachaqarqanipaschu, manallataqmi Ch'uya Diosmantaqa imatapas yachanichu.

⁴¿Pin hanaq pachaman wicharqan, hinaspa uraykamurqan? ¿Pin wayrata makinwan hap'iykurqan? ¿Pin mama qochata ponchonpi khipuykurqan? ¿Pin kay pacha teqsimuyuntinta allinta sayachirqan? ¿Iman sutin? ¿Iman churinpa sutin? ¡Yachankichus chayqa, willaway!

⁵Diospa llapa siminqa cheqaqpunin, payqa payman pakaykukuqkunatan hark'aykun.

⁶Ama siminkunaman yapaykuychu, phiñarisunkin, hinan llulla rikhurinki.

⁷Diosnilláy, iskayllatan mañakuyki, manaraq wañukapushaqtiy chaykunataqa qoykuwaypuni:

⁸Llullakuytapas runa q'otuytapas karunchaway, ama wakchayachiwaypaschu qhapaqyachiwaypaschu, sapa p'unchay mikhunallayta qoway,

⁹paqtan askhallaña kaqniyoq kaspay negapuykiman, hinaspa niyman: ¿Pitaq Señor Diosqa? nispa. otaq wakchayapuspay suwakuyman, hinaspa sutiykita sarunchayman.

¹⁰Ama kamachitaqa patronninpa qayllanpi tumpaykuychu, paqtan pay ñakasunkiman, hinaspa muchuwaq.

¹¹Kanmi taytanta ñakaq runa, mamantapas mana saminchaq.

¹²Kanmi ch'uya kasqanta yuyaq runa, qhelli-kayninmanta manaña ch'uyanchakushaspapas.

¹³Kanmi allichachaq kasqantapuni yuyaq runa, hukkunatataq hatunchakuywan qhawaykuq.

¹⁴Kanmi runa, kirunkun espadakuna hina, maran kirunkupas cuchillokuna hinan, paykunan suyupi kaq wakchakunata oqoykunku, runakuna ukhupi kaq pisichikuqkunatapas millp'uykunku.

¹⁵Iskay ususiyoqmi unu k'uykaqa, chaykunan: ¡Qoway! ¡Qoway! nispallapuni qaparinku. Kinsan mana hayk'aq saksaq, tawakaqqa manan hayk'aqpas: Chayllataña, ninchu:

¹⁶Wañuy-pacha, mana wiksallikuq wiksa, unullata ch'onqaq ch'aki hallp'a, ninapas mana hayk'aq: ¡Chayllataña! niq.

¹⁷Pipas taytanta asipayan chayqa, mamantaqa pisichaspa mana kasunchu chayqa, wayq'opi kaq alqamarikuna ñawinta sik'ichunku, anka uñakunapas upichunku.

¹⁸Kinsan musphachiwan, tawakaqtapas manataqmi entiendenichu:

¹⁹Wayrapi imaynatachus ankaq phalasqanta, qaqa patapi imaynatachus mach'aqwaypa suchusqanta, mama qocha ukhupi imaynatachus barcoq purisqanta, sipasqa imaynatachus qosanwan hukllachakusqanta.

²⁰Wasanchaq warmiqa kay hinatan ruwan: Mikhun, siminta pichakun, hinaspa nin: Manan ima mana chanintapas ruwanichu, nispa.

²¹Kinsan kay pachataqa kuyurichin, tawakaqtaqa manan muchuyta atinchu:

²²Kamachi runa rey kapuqtin, mana yuyayniyoq runa allinta saksaykuqtin,

²³mana munasqa warmi casarakuqtin, kamachi warmi patronanpa rantinpi patrona kapuqtin.

²⁴Tawan kay pachapi aswan huch'uy animalkunaqa, chaywanpas chaykunan aswan yachaysapa:

²⁵Sisikuna: Chaykunaqa manan kallpayoq llaqtachu, chaywanpas q'oñi mitapin mikhunankuta huñunku.

²⁶Qowikuna: Chaykunaqa manan kallpachasqa llaqtachu, chaywanpas qaqapin wasichakunku.

²⁷Langostakuna: Chaykunaqqa manan reyninku kanchu, chaywanpas llapallankun wachuchasqa lloqsinku.

²⁸Qaraywakuna: Chaykunataqa maki qochallapin hap'iykuna, chaywanpas reykunaq qhapaq wasinpin kashan.

²⁹Kinsan kusa puriqkuna, tawakaqtaqmi qharitapuni purin:

³⁰León: Chayqa llapa animalkuna ukhupi kallpasapan, manan imapas ayqechinchu,

³¹anchaykachaq k'anka, hinallataq orqo cabrapas, mana piqpa kutichinan reypas.

³²Mana yuyaywanchus hatunchakuyta munarqanki chayqa, mana allinkaqkunatapas ruwayta yuyaykurqanki chayqa, ¡allintapuni yuyaykuy!

³³Lechetachus qaywinki chayqa, mantequillatan horqonki, senqaykitachus sinchita q'ewinki chayqa, yawartan horqonki, runamasiykitachus k'arakta phiñarinki chayqa, ch'aqwaymi kanqa, nispa.