Read Quechua Cuzco Bible 1988 PROVERBIOS 5 Bible Online

PROVERBIOS 5 - Quechua Cuzco Bible 1988 bible

PROVERBIOS 5

¹Churilláy, yachayniyta maki uyariy, allin yuyayniyta maki uyariy,

²allintapuni reparaspa yuyaykukunaykipaq, reqsiq-kaywanpas rimanaykipaq.

³Wasanchaq warmiqa misk'itan riman, rimasqanqa aceitemantapas aswan llamp'un,

⁴qhepamanmi ichaqa ajenjomantapas aswan hayata paqarichin, iskay filoyoq espadamantapas aswantan k'irin.

⁵Payqa wañuymanmi pusaykusunki, ñanninqa Wañuy-pachamanmi apaykun.

⁶Payqa manan kawsay ñanta qhawarinchu, kawsayninqa waqllisqan, manan payqa reparakunchu.

⁷Chay hinaqa, churiykuna, uyariwaychis, ama simiykunamanta anchhuriychischu.

⁸Chay wasanchaq warmimanta karunchakuy. ama wasi punkullanmanpas asuykuychu,

⁹paqtan hukkunaq qayllanpi mana allinpaq qhawarisqa kawaq, paqtan yana alma runaq kamachin kapuwaq.

¹⁰Paqtan huk runakuna qhapaq-kayniykiwan q'ochukunkuman, llank'asqaykikunapas wak runata qhapaqyachinman.

¹¹Paqtan qhepaman llakipakuwaq cuerpoyki toqtiyaykapuqtin,

¹²hinaspataq niwaq: ¡Imaynataraqmi kunaykuyta cheqnikurqani! ¡Imaynataraqmi sonqoypas anyaykuyta pisicharparirqan!

¹³Manan yachachiwaqniykunaq siminta uyariyta munarqanichu, manan yachachiwaqniykunata makichu uyarirqani,

¹⁴sinchi mana allin patapiñan kashani llaqtay runaq llapanpa rikushasqan, nispa.

¹⁵Unu p'uytullaykimanta ukyakuy, p'uytuykimanta phullpumuqta ukyakuy.

¹⁶¿Pukyuyki unuta hawaman llimp'achiwaqchu? ¿Phullpumuq unuykita plazakunaman usuchiwaqchu?

¹⁷Qanllapaq chaykunaqa kachun, ama hukkunamanwanqa ukyachiychu.

¹⁸Casarakusqayki warmiqa pukyu hinan, payta saminchay, payllawan kusikuy,

¹⁹payqa munasqa taruka hinan, munay luychu hinan. Paypa munakuyninwanqa kusisqallapuni kay, munakuyninqa sonqoykita suwallachunpuni.

²⁰Churilláy, ¿imanaqtintaq wak warmimanqa wañuyta k'askakunki? ¿Imanaqtintaq wasanchaq warmiwanqa oqllanakunki?

²¹Runaq imayna kawsasqanqa Señor Diospa ñawpaqenpin kashan, paymi tukuy purisqankunata qhawashan.

²²Millay runataqa millay ruwasqankunallataqmi mayt'un, huchallanwantaqmi watachikun.

²³Payqa kikinta mana mat'iykukusqan hawan wañunqa, sinchi mana yuyayniyoq kasqanmi wañuyman q'epiykunqa.