Read Quechua Cuzco Bible 1988 ECLESIASTÉS 1 Bible Online

ECLESIASTÉS 1 - Quechua Cuzco Bible 1988 bible

ECLESIASTÉS 1

¹Yachachiqqa Davidpa churinmi, paymi Jerusalenpi rey karqan. Paymi nirqan:

²¡Yanqapunin! ¡Qasipunin! ¡Tukuy imapas yanqakaman!

³¿Ima allintan runaqa llank'asqanmanta tarin tukuy uma nanaywan kay pachapi llank'aspa?

⁴Wakinmi wañun, wakintaq paqarin, kay pachan ichaqa kaqllapuni kashan.

⁵Intin lloqsimun, hinaspan haykupun, chaymantataq usqhaylla kutirin maymanchus lloqsimusqanman.

⁶Wayran urayman wayramun, hinaspan wichayman kutirin. Muyumushaspataq wayraqa purinantapuni kutirimun.

⁷Mayukunaqa llapallanmi mama qochaman haykun, mama qochataq manapuni hunt'anchu. Maymantachus mayukunaqa lloqsimurqan, chaymanmi kutipunku wakmanta phawamunankupaq.

⁸Tukuy imaymanan sinchitapuni runata sayk'uchin, chaykunaqa sinchi askhan mana rimariy atiyraq. Manan ñawipas qhawaspa utinchu, manan ninrinpas uyarispa amikunchu.

⁹Imachus karqan, chayllataqmi kanqa, imachus ruwakurqan, chayllataqmi ruwakunqa, manan kay pachapiqa ima mosoqpas kanchu.

¹⁰¿Imallapas kanchu: Kayqa mosoqmi, ninapaq? Manapunin kanchu, unay watakunamantañan karqanña, manaraq kashaqtinchismi karqanña.

¹¹Ñawpa runakunaqa qonqasqañan kapunku, nacenqaku chaykunapas qhepankuta naceqkunaq qonqasqallantaqmi kanqaku.

¹²Ñoqa Yachachiqmi Jerusalenpi Israel suyu rey karqani.

¹³Tukuy sonqo maskhaspaymi yachaywan t'aqwirqani kay pachapi tukuy ima ruwasqata. ¡Diospa runakunaman qosqan llank'anaqa sinchi uma nanaymi!

¹⁴Tukuy imaymanatan kay pachapi ruwasqata qhawarirqani, tukuy chaykunaqa yanqan, wayra hap'iykuy hinallan kasqa.

¹⁵Q'ewisqaqa manan kuskachakuyta atikunchu, mana hunt'asqapas manan yapakuyta atikunchu.

¹⁶Sonqoypin nirqani: Ñoqaqa hatunyaykapunin, Jerusalenpi tukuy ñoqamanta ñawpaqkaq kamachikuqkunamantapas astawanmi yachaykapuni, ñoqan ancha yachayniyoqpas yuyayniyoqpas kani, nispa.

¹⁷Yachaytapas, mana yuyaywan rimaytapas, yanqa thawtiytapas allinta entiendenaypaqmi kallpachakurqani. Chaymi repararqani chaypas wayra hap'iykuy hinalla kasqanta.

¹⁸Askha yachaypiqa uma nanayllapunin kan, astawan yachaqqa, astawanmi muchun.