Read Quechua Cuzco Bible 1988 ECLESIASTÉS 10 Bible Online

ECLESIASTÉS 10 - Quechua Cuzco Bible 1988 bible

ECLESIASTÉS 10

¹Imaynan wañusqa ch'uspikunaqa q'apaq hawinata millayta asnachin, ahinan huk chhikan mana yuyayniyoq-kaylla yachayniyoqpaq yupaychanapaq qhawasqataqa waqllichin.

²Yachayniyoqpa sonqonqa allinkaqmanmi k'askakun, mana yuyayniyoqpa sonqonmi ichaqa mana allinkaqman k'askakun.

³Mana yuyayniyoqqa ñanta purishaspapas mana yuyayniyoq kasqantan rikuchikun, llapatapas nin: Mana yuyayniyoqmi kani, nispan.

⁴Kamachikuqchus phiñarisunki chayqa, ama imachus ruwanaykita saqepuychu, samp'ayaykuyqa hatun pantaykunatan hark'an.

⁵Huk mana allintan kay pachapi rikurqani, chaytaqmi kamachikuqkunamanta paqarimun:

⁶Mana yuyayniyoqqa hatun kamachikunapi churasqan kashan, qhapaqkunan ichaqa wakcha tiyanapi tiyashanku.

⁷Kamachikunatan caballopi puriqta rikurqani, kamachikuqkunatataq kamachi hina chakipi puriqta.

⁸T'oqota hasp'iqqa chaymanmi urmaykunman. Perqata q'asaqtaqa mach'aqwaymi kaninman.

⁹Rumita horqoqqa chaywanmi k'irikunman. Llant'ata ch'eqtaqqa chaywanmi k'irikunman.

¹⁰Fierrochus molq'ayapun, manataq filoyachisqachu chayqa, aswan kallpawanmi waqtanqa, yachaymi ichaqa allinta ruwanapaq kusata yanapan.

¹¹Mach'aqwaychus manaraq khurusqa kashaspa kanin chayqa, manan imatapas khuruqqa chaskinñachu.

¹²Yachayniyoqpa rimasqankunaqa ancha sumaqmi, mana yuyayniyoqpa rimasqankunan ichaqa pay kikinta waqllichin.

¹³Mana yuyayniyoq simikunatan rimayta qallarin, millay waq'a simikunata rimaspataq tukupunpas.

¹⁴Mana yuyayniyoqqa askhatan riman. Manan pipas yachanchu imachus qhepaman kanantaqa, ¿pitaq willakunman imachus qhepaman kananta?

¹⁵Sinchitan mana yuyayniyoqqa llank'aspa sayk'un, chaymi maynintachus llaqtaman riytapas mana yachanchu.

¹⁶¡Ay qanmanta, hatun suyu! ¿Imaninkin reyniyki waynalla kaqtin, umalli runaykikunapas pacha paqariyta machaspa mikhuqtin?

¹⁷¡Kusisamiyoqmi kanki hatun suyu, reyniyki allichachaq runaq churin kaqtin, mana machaspanku kallpata hap'inankupaq umalli runaykikunapas horasllanpi mikhuqtin!

¹⁸Qellaq wasinmi q'echuykukun, maki oqllasqa runaq wasinmi sut'umun.

¹⁹Mikhunaqa kusikunapaqmi, vinoqa kawsayta kusichinapaqmi, qolqetaqmi ichaqa allin imaymanapaq.

²⁰Ama reymantaqa yuyaynillaykipipas millaytaqa niychu, ama qhapaqtaqa puñunayki wasillapipas ñakaychu, phalaq animalkunan rimasqaykita apanman, raphrayoqkunan simita willanman.