Read Quechua Cuzco Bible 1988 ECLESIASTÉS 2 Bible Online

ECLESIASTÉS 2 - Quechua Cuzco Bible 1988 bible

ECLESIASTÉS 2

¹Sonqoytan nirqani: Kunanqa kusikuywan probasqayki imachus allin kasqanta yachanaypaq, nispa. Chaypas yanqallataqmi karqan.

²Chaymi asikuyta: Waq'ayaymi, nirqani. Aycha kusichiytapas: Mana imapaq valeqmi, nirqani.

³Sonqoypi yachaypas kashaqtinmi, cuerpoyta vinowan kusichiyta munarqani, mana yuyayniyoq-kayta reqsiytapas munarqani. Chaywanmi yachayta munarqani imakunachus runapaqqa allin ruwananpaq kasqanta. Runaqa kay pachapi pisi p'unchaykunallatan kawsan.

⁴Hatun ruwaykunatan ruwarqani, qhapaq wasikunatan ruwakurqani, uvas chakrakunatan ruwarqani.

⁵Huertakunatan kanchakunatan ruwakurqani, chaykunapin tukuy rikch'aq fruta sach'akunata plantarqani.

⁶Unu qochakunatan ruwakurqani mallkisqa sach'akunata qarpanaypaq.

⁷Qhari kamachikunatapas warmi kamachikunatapas rantirqanin, wasiypi naceq kamachiykunapas karqanmi. Kallarqantaqmi askha wakaykunapas ovejaykunapas, Jerusalenpi llapa ñoqamanta ñawpaqkaq tiyaqkunamantapas aswan askharaq.

⁸Huñullarqanitaqmi qolqetapas, qoritapas, reykunaq illankunatapas, suyuypa hap'iyninkunaq chaniyoq illankunatapas. Karqanmi takipuqniy qharikunapas, takipuqniy warmikunapas, tiyaqmasi askha warmiykunapas aychayta kusichinankupaq.

⁹Mentasqa runan karqani, Jerusalenpi llapa ñoqamanta ñawpaqkaq tiyaqkunamantapas aswanraq. Chaypas yachayniyqa manan saqewarqanchu.

¹⁰Ñawiypa rikusqantaqa manan hark'arqanichu, sonqoytaqa ima kusikunanmantapas manan hark'arqanichu. Tukuy llank'asqaywanmi q'ochukurqani, chay q'ochukuymi tukuy llank'asqaymanta premioyqa karqan.

¹¹Chaymantataq tukuy ruwasqaykunata qhawarirqani, uma nanaywan llank'aspa tarisqayta qhawarirqani, ichaqa tukuymi yanqakama wayra hap'iykuy hinalla karqan, mana imapaq valeqtaq kanpas.

¹²Qhawarillarqanitaq yachaytapas, yanqa thawtiykunatapas mana yuyayniyoq-kaytapas rikunaypaq. ¿Imatan huk reyqa huk reypa qhepanta ruwanman? Manan imatapas, aswanpas imachus ruwasqaña kaqllatan.

¹³Repararqanitaqmi yachayqa mana yuyayniyoq kaymanta aswan allin kasqanta, imaynan k'anchaypas laqhayaqmanta aswan allin kan chay hina.

¹⁴Hamawt'aqa umanpi ñawiyoqmi, mana yuyayniyoqmi ichaqa laqhayaqpi hina purin. Chaypas ñoqaqa reparanin llapatapas kaqtakamalla sucedenanta.

¹⁵Chaymi ñoqaqa sonqoyta nirqani: Imaynan mana yuyayniyoqta suceden, chhaynatan ñoqatapas sucedewanqa. Chhaynaqa, ¿yachayniyoq kasqayqa ima allinniypaqtaq? ¡Yanqan chaypas!

¹⁶Manan hamawt'amantapas mana yuyayniyoqmantapas hayk'aqpas yuyarikunqañachu, qhepa p'unchaykunapiqa tukuymi qonqasqa kapunqa. Hamawt'apas mana yuyayniyoq hinallataqmi wañukapunqa, nispay.

¹⁷Chaymi kawsayta cheqnikurqani, kay pachapi ruwasqaqa uma nanay kaqtin. Tukuy imapas yanqakaman, wayra hap'iykuy hinalla karqan.

¹⁸Ahinallataqmi kay pachapi uma nanaywan tukuy llank'asqayta cheqnikurqani, huk qhepay hamuqman chayta saqesaq chayrayku.

¹⁹Chaytan yachaywan sinchi afanakuywan llank'arqani. Chayri, ¿pitaq yachan yachayniyoqchus icha mana yuyayniyoqchus tukuy llank'asqayta hap'inanta? Chaypas yanqallataqmi.

²⁰Chaymi tukuy uma nanaywan llank'asqaymanta llakikuspay p'iti-p'itirqani.

²¹Runaqa yachaywanmi, reqsiywanmi, llank'ay yachaywanmi llank'anman, chaypas mana chayta llank'aq runamanmi saqenqa. Chaypas yanqallataqmi, sinchi mana chanintaq kanpas.

²²Chayri, ¿imatan runaqa tarin chay tukuy uma nanaywan llank'asqanmanta, sinchita llakipakusqanmantapas?

²³Tukuy kawsasqan p'unchaykunaqa nanayllañan, tukuy llank'asqanpas uma nanayllan. Manan tutapas yuyayninqa samaykunchu. Chaypas yanqallataqmi.

²⁴Runapaqqa aswan allin mikhuyllan, ukyayllan, llank'asqanpipas kusikuynillanmi. Rikullanitaqmi chaypas Diospa qosqan kasqanta.

²⁵Mana paywanqa, ¿pitaq mikhunman? ¿Pitaq q'ochukunman?

²⁶Kusichiqnin runamanqa Diosmi yachaytapas, reqsiytapas, q'ochukuytapas qon, huchasapamantaqmi qon askha qhapaq-kayta huñuspa waqaychananpaq, pichus Diosta kusichiqman chay qhapaq-kayta qonanpaqwan. Chaypas yanqan, wayra hap'iykuy hinallan.