Read Quechua Cuzco Bible 1988 ECLESIASTÉS 3 Bible Online

ECLESIASTÉS 3 - Quechua Cuzco Bible 1988 bible

ECLESIASTÉS 3

¹Kay pachapiqa imaymanapaqmi tiempo kan, imapas maychus kananpin suceden:

²Kanmi nacena tiempo, wañuna tiempopas. Kanmi mallkina tiempo, mallkisqata t'irana tiempopas.

³Kanmi wañuchina tiempo, hampina tiempopas. Kanmi thunina tiempo, perqana tiempopas.

⁴Kanmi waqana tiempo, asikuna tiempopas. Kanmi lutokuna tiempo, tusuna tiempopas.

⁵Kanmi rumi ch'eqechina tiempo, rumi huñuna tiempopas. Kanmi abrazana tiempo, mana abrazana tiempopas.

⁶Kanmi maskhana tiempo, chinkachina tiempopas. Kanmi waqaychana tiempo, wikch'una tiempopas.

⁷Kanmi llik'ina tiempo, sirana tiempopas. Kanmi upallakuna tiempo, rimana tiempopas.

⁸Kanmi munakuna tiempo, cheqnikuna tiempopas. Kanmi hatun maqanakuy tiempo, sumaq kawsay tiempopas.

⁹¿Ima allintataq runari uma nanaywan llank'asqanmanta tarin?

¹⁰Ñoqan rikurqani Diosqa ruwashanankupaq runakunaman llank'anata qosqanta.

¹¹Diosqa lliwtan tiemponpi tupaqpaq ruwarqan. Runamanqa qoykurqanmi wiñay kaqpi yuyay atiyta, chaypas runaqa manan llapanta reparayta atinchu Diospa qallariymanta tukukuykama ruwasqantaqa.

¹²Ñoqaqa yachanin, kawsashanankamaqa manan aswan allinqa runapaq kanchu, aswanpas kusikunallanmi, allinkaqllatapuni ruwanallanmi.

¹³Diospa qowasqallanchistaqmi mikhunchisña, ukyanchisña, tukuy llank'asqanchiswanña q'ochukunchis chaypas.

¹⁴Yachanin tukuy imapas Diospa ruwasqanqa wiñaypaq kasqanta. Manan chaymanqa yapakunqañachu, manallataqmi pisiyachikunqañapaschu. Chhaynatan Diosqa ruwan runaq payta manchakunanpaq.

¹⁵Kunan imachus kaqqa karqanñan, hamuq p'unchaypi imachus kanqa, chaypas karqanñan. Diosqa imachus karqanña chaytaqa kutichimunmi.

¹⁶Kay pachapiqa rikullarqanitaqmi chaninchaymantaqa mana chaninkaqta, kuskachaymantaqa mana allin ruwasqa kaqta.

¹⁷Chaymi sonqoyta nirqani: Chanin runatapas mana chanin runatapas Diosmi taripanqa, tukuy ruwananpaqpas tukuy imapaqpas tiempo kasqanrayku, nispa.

¹⁸Runamantapas sonqoyta nillarqanitaqmi: Chayqa hinapunin, runakunatan Diosqa probashan, paykunaqa animalkuna hinapuni kasqankuta reparakunankupaq.

¹⁹Runawan uywawanqa kaq p'uchukaynillayoqmi: runapas uywapas wañunmi, kaqkama kawsay samayniyoqmi kanku. Manan runaqa aswan allinchu uywamantaqa. Tukuy imapas yanqallan.

²⁰Lliwmi kaq cheqasllaman ripun, llapallanmi ñut'u hallp'amanta ruwasqa karqan, llapallantaqmi ñut'u hallp'aman tukupunqa.

²¹¿Pitaq yachan runaq espiritun hanaqman wicharipusqanta, animalpa espiritunpas hallp'a pacha ukhuman uraykusqanta?

²²Reparanin runapaq aswan allinqa llank'asqanwan kusikunan kasqanta, chaymi paypa tupaqninqa. Manan pipas paymanqa rikuchinqachu wañusqan qhepata imachus kanantaqa.