Read Quechua Cuzco Bible 1988 ECLESIASTÉS 4 Bible Online

ECLESIASTÉS 4 - Quechua Cuzco Bible 1988 bible

ECLESIASTÉS 4

¹Rikullarqanitaqmi kay pachapi tukuy sarunchakuykunatapas. Sarunchasqakunan waqasharqanku, manataq pipas paykunata sonqochaykuq karqanchu, muchuchiqninkutaqmi munayniyoq kasharqanku, manataqmi pipas paykunamanta sayarikuq karqanchu.

²Chaymi ñoqaqa wañukapuqkunamanta nirqani: Paykunaqa aswan kusisqan kawsaqkunamantaqa.

³Iskayninkumantapas aswan kusisamiyoqqa kunankama manaraq naceqkunan, manan rikunkuraqchu kay pachapi millay ruwasqakunata.

⁴Rikullarqanitaqmi envidianakuyqa tukuy llank'ayta tukuy ima tariyta paqarichisqanta. Chaypas yanqan, wayra hap'iykuy hinallan.

⁵Mana yuyayniyoqqa makintan qhotuykukun, payllatataq mana allinta ruwakun.

⁶Aswan allinmi pisi kaqllawan kusisqa kawsay askha kaqniyoq kaspa llakisqa afanakuymantaqa.

⁷Kay pachapin huk yanqakaqtawan rikurqani:

⁸Kanmi mana piniyoq sapallan runa, manan churinpas wawqenpas kanchu. Manan hayk'aqpas chhikallantapas samarinchu, manataqmi qhapaq-kayninkunata qhawaspanpas amikunchu. Tapurikunmi: ¿Pipaqmi sayk'usqallaña llank'ashani? ¿Imanaqtintaq allinkaqtari mana usachinichu? nispa. Chaypas yanqan, mana munanataq kanpas.

⁹Aswan allinmi iskay runa huk runallamantaqa, aswan allinta llank'asqankumanta chaskinqaku.

¹⁰Hukkaqchus urman chayqa hukkaqmi aysarin. Ichaqa, ¡ay ch'ullalla runamanta! Urmaqtinqa manan pipas aysariqnin kanqachu.

¹¹Iskay puñuspaqa q'oñichinakunkun. Chayri, ¿imaynatan ch'ullallaqa q'oñirinman?

¹²Ch'ullallaqa atipachikunmanmi, iskayqa manan atipachikunqachu. Kinsanpa q'aytupas sasatan p'itikun.

¹³Aswan allinmi wakcha wayna, ichaqa yachayniyoq, kunaykuy simikunatapas mana uyarikuq mana yuyayniyoq machu reymantaqa.

¹⁴Runaqa carcelmanta lloqsispa rey kayta atinmanmi, kamachikusqan suyupi wakchaña nacemurqan chaypas.

¹⁵Ichaqa kay pachapi tukuy runata rikuspan repararqani reypa rantinpi wak wayna kamachikunanpaq kashaqta.

¹⁶Mana yupay atinan kamachisqan runakunaqa karqan, ichaqa paykunaq wawankunaqa manan reywan kusisqachu kasharqanku. Chaypas yanqan, wayra hap'iykuy hinallan.