Read Quechua Cuzco Bible 1988 ECLESIASTÉS 5 Bible Online

ECLESIASTÉS 5 - Quechua Cuzco Bible 1988 bible

ECLESIASTÉS 5

¹Dios yupaychana wasita rispaykiqa qhawarikuy maypichus kashasqaykita. Aswan allinqa maki uyarinaykipaq asuykuymi mana yuyayniyoqkuna hina sacrificiota haywanapaq asuykuymantaqa, huchallikuspaqa manan huchapaqchu reparanku.

²Ama hawan-ukhuntaqa rimaychu, ama sonqoykipas Diosmanqa usqhayllata prometekuchunchu. Diosqa hanaq pachapin kashan, qantaq kay pachapi kashanki. Chayrayku, rimasqaykiqa pisilla kachun.

³Sinchi llakipakuywanmi mosqopakuyqa kan, askha rimasqawantaqmi mana yuyaywan rimasqapas kan.

⁴Diosman prometekuspaykiqa, usqhaylla chayta hunt'ay, Diostaqa manapunin mana yuyayniyoqkunaqa kusichinchu. Hunt'ay prometekusqaykitaqa.

⁵Aswan allinmi mana prometekuyniyki, prometekushaspa mana hunt'ayniykimantaqa.

⁶Ama simiykiwan huchaman tanqaykachikuychu, aman sacerdotetapas: Prometekusqayqa pantasqan karqan, ninkichu. ¿Imapaqtaq Diosta simiykiwan phiñachiwaq? Paymi makiykiq ruwasqanta waqllichinman.

⁷Ancha mosqopakuylla kan chayqa, askhayanmi yanqa rimasqakunapas. Qan ichaqa Diosta manchakuy.

⁸Suyuq huk hap'iyninpichus wakchakuna sarunchayta rikunki, chaninchaytapas kuskachaytapas waqllichisqata rikunki chayqa, aman chaywan utirayankichu. Hatun kamachikuqtaqa huk aswan hatun kamachikuqmi qhawamushan, chay iskay hatun kamachikuqkunatapas aswan hatun kamachikuqkunaraqmi qhawamushan.

⁹Chaypas allinmi suyuqa reyniyoq kaynin, campota yanapananpaq.

¹⁰Qolqeman sonqollikuqqa, astawanpunin munan, imaymanayoq kayta munaqpas, astawan tariytan munan. Chaypas yanqallataqmi.

¹¹Imaymanapas askhayaqtinqa gastaqkunapas askhayallantaqmi. ¿Ima allinninpaqtaq dueñopaqqa kanqa? Chaykunata qhawarispa kusikuynillanmi.

¹²Llank'aqqa misk'itan puñun, askhataña pisitaña mikhun chaypas, qhapaqtan ichaqa askha kaqninkuna mana puñuchinchu.

¹³Huk sinchi mana allintan kay pachapi rikurqani: Huk runan qhapaq-kaykunata waqaychan, chaytaqmi mana allinnillanpaq kapun.

¹⁴Chay qhapaq-kaykunan mana allin ruwaykunapi usupun, churiyasqan wawapaqtaq mana imapas qhepanchu.

¹⁵Imaynan mamanpa wiksanmanta paqarimurqan q'alalla, ahinallataqmi q'alalla kutipun. Manataqmi ima llank'asqantapas apakunchu, mana imallantinmi ripun.

¹⁶Kaypas sinchi mana allinmi: Imaynan kay pachaman hamurqan, ahinan kutipuyninqa. ¿Ima allinninpaqtaq yanqapaq uma nanaywan llank'asqanri?

¹⁷Hinaspapas, tukuy kawsasqan p'unchaykunapin llakisqa mikhun, sinchi uma nanaywan, onqoywan, sientekuywan ima.

¹⁸Kaytan ñoqa repararqani: Runapaq allinkaqqa tupaqkaqqa mikhuyninmi ukyayninmi. Diosmi chayta qorqan pisillata kawsasqan p'unchaykuna ruwananpaq. Chaymi runaq tupaqninqa.

¹⁹Pimanchus Diosqa qhapaq-kaykunatapas ima kawsaykunatapas qon, chay runataqa chaykunawan kusichillantaqmi uma nanaywan llank'asqanpipas, hinaspan tupaqninta chaskichin. Chayqa Diospa qosqanmi.

²⁰Sonqonta Dios kusichiqtinmi, mana anchatachu yuyarin kawsasqan p'unchaykunataqa.